Baıqońyrdan 29 otbasy elimizdiń soltústigine qonys aýdarady
Bul jóninde óńirlik kommýnıkatsııalar qyzmetinde ótken baspasóz máslıhatynda oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń mindetin atqarýshy Gaýhar Qalmaqova aıtyp ótti.
«Bizde Baıqońyr qalasyndaǵy Reseı Federatsııasyna qarasty kásiporyndardan jumystan bosaǵan qazaqstandyq azamattardy jumysqa ornalastyrý máselesi - udaıy baqylaýda. Taıaý kúnderi osy maqsatta Baıqońyr qalasyndaǵy Qazaqstan jáne Reseı taraptary boıynsha eńbekpen qamtý ortalyqtary arasynda kelisimge qol qoıý josparlanǵan. Atalmysh kelisimniń arqasynda qos tarap boıynsha jumystan bosaǵan azamattardy eńbekpen qamtý máselesinde naqty is-sharalar qolǵa alynady. Máselen, biz maýsym aıynda elimizdiń soltústik aımaǵy ókilderiniń qatysýymen bos oryndar jármeńkesin ótkizdik. Nátıjesinde Baıqońyr qalasynda turatyn 29 otbasy elimizdiń soltústik aımaqtaryna kóshýge nıet bildirdi», - dedi G.Qalmaqova.
Sondaı-aq, qazirgi ýaqytta osyndaı azamattardy eńbekpen qamtý maqsatynda «Tıimdi eńbek jaǵdaılaryn damytý jáne jappaı kásipkerlikti damytý» baǵdarlamasy negizinde jumyspen qamtýǵa mán berilip otyr. Buryn bul máselemen Baıqońyrdaǵy Reseı Federatsııasy quzyryndaǵy halyqty jumyspen qamtý ortalyǵy aınalysyp keldi.
Ústimizdegi jyldan bastap Baıqońyr qalasynda Qazaqstan Respýblıkasy tarapynan eńbekpen qamtý ortalyǵy ashyldy. Joǵaryda aıtylǵan kelisim sheńberinde endigi kezekte qos tarap boıynsha tıimdi qarym-qatynas ornap, ózge de máselelerdi sheshýge nazar aýdarylady.