Baıqońyrdaǵy ushyrylymdy júzdegen sheteldikter tamashalaı alady

BAIQOŃYR. QazAqparat - Halyqaralyq ǵarysh stansasyna kezekti ekspedıtsııa ekıpajymen «Soıýz MS-05» kóliktik basqarylatyn keme Baıqońyr ǵarysh aılaǵynan ushyrylýǵa kemi eki táýlik qaldy, dep habarlady «QazAqparat» HAA tilshisi.

Búgin, 26 shildede   «Soıýz MS-05» KBK-men «Soıýz-FG» zymyran tasyǵyshy montajdaý-synaq korpýsynan shyǵaryldy da Baıqońyr ǵarysh aılaǵynyń №1 alań ushyrý keshenine ornatyldy. MSK-den ushyrý keshenine deıin ara qashyqtyq nebári birneshe shaqyrym ǵana, biraq tehnıkalyq talapqa sáıkes temir jol boıynsha qozǵalys baıaý jyldamdyqpen júrip, birneshe saǵatqa sozylady.

Ǵarysh kemesin shyǵarý jáne tasymaldaý barysyn Reseı, Qazaqstan, Eýropadan júzdegen týrıster, taıaý jáne alys shetelderden akkredıttelgen jýrnalıster baqylady. «QazAqparat» HAA tilshisine belgili bolǵandaı, Baıqońyrdan ushyrylymdy EKSPO kórmesine qatysqan elderden 50 komıssar baqylaıdy dep josparlanýda.

 «Soıýz MS-05» KBK-men «Soıýz-FG» ZT  ushyrý qondyrǵysyna ornatqannan keıin  Reseı zymyran-ǵaryshtyq sala kásiporyndarynyń mamandary birinshi ushyrylym kúngi baǵdarlama jumystaryna kirisip ketti. Olar radıobaılanys júıesin tekseredi, ekıpajdyń avarııalyq qutqarý júıesiniń ázirligine baqylaý  júrgizedi, tsıfrlyq aqparat jıyndaryn testileýden ótkizedi, dep habarlady Roskosmos baspasóz qyzmeti.

Zymyran Astana ýaqyty boıynsha saǵat 21.41-de Baıqońyr ǵarysh aılaǵynyń Gagarın alańynan ushyrylady dep josparlanýda.