Baıqońyrdaǵy «Proton» apaty «Roskosmostyń» ishki máselesi - T. Musabaev

ASTANA. 2 shilde. QazAqparat - «Roskosmos» ókilderi Baıqońyrda oryn alǵan «Proton» zymyranynyń apatyn ózderiniń ishki máselesi dep otyr.

Búgin Úkimette atalǵan máselege oraı Premer-Mınıstr Serik Ahmetovtiń tóraǵalyǵymen ótken keńeste Ulttyq ǵarysh agenttiginiń tóraǵasy Talǵat Musabaev osylaı málim etti.

Agenttik basshysynyń aıtýyna qaraǵanda, Qazaqstan men Reseı Úkimetteriniń arasyndaǵy «Baıqońyr» aılaǵynda zymyran ushyrý barysynda apat týyndaǵan jaǵdaıda ózara is-qımyl tártibi týraly Kelisimniń 1 babyna sáıkes, apat dep zymyran nemese onyń bólshekteriniń reseı tarapy qazaqstandyq taraptan jalǵa alatyn terrıtorııanyń syrtyndaǵy Qazaqstan Respýblıkasynyń aýmaqtaryna qulaýy tanylady. «Bul kelisim 2006 jyldyń 22 mamyrynda №141 zańmen ratıfıkatsııalanǵan. Osyǵan oraı quqyqqa salsaq, bul apat retinde tanylmaıdy. Bul «Roskosmostyń» ishki máselesi jáne buny olar aýyzsha jumys tártibimen málimdedi. Biz olarmen baılanystamyz, ózimizge qajetti aqparattardy shapshań berilýin talap etip otyramyz», dedi T.Musabaev.

Eske salsaq, búgin DM-03 údetkish blogy jáne «Glonass-M» úsh reseılik navıgatsııalyq ǵarysh apparaty bar «Proton-M» zymyran-tasyǵyshy búgin jergilikti ýaqyt boıynsha saǵat 08.38-de «Baıqońyr» ǵarysh aılaǵynyń №81 alańynan ushyrylymy josparlanǵan bolatyn. «Proton-M» zymyran-tasyǵyshy ushyrylymnyń 10 sekýndynda jerge qulap, jaryldy. Apat ushyrý alańynan 2-3 shaqyrym jerde oryn aldy.