Baıqońyrdaǵy medıtsına salasy qalaı ózgeredi
Jalpy otyrysta palata depýtattary «2009 jylǵy qarashadaǵy QR Úkimeti men RF Úkimeti arasynda «Baıqońyr» keshenin jalǵa alý jaǵdaıynda ǵarysh aılaǵynyń personalyna, Baıqońyr qalasynyń, Tóretam jáne Aqaı kentteriniń turǵyndaryna medıtsınalyq qyzmet kórsetý tártibi týraly kelisimge ózerister engizý týraly hattamany ratıfıkatsııalaý týraly» Zańyn qabyldady.
Qoldanystaǵy kelisiminiń aıasynda osy Baıqońyr qalasynda turatyn Qazaqstan azamattaryna kórsetiletin medıtsınalyq kómek tek reseılik medıtsınalyq uıymdarmen RF zańnamasyna sáıkes beriledi. Qazaqstanda júzege asyrylatyn medıtsınalyq kómektiń erekshelikterin eskere otyryp, el azamattary zańnamamyzǵa sáıkes tegin medıtsınalyq kómekti, dárilik zattar men medıtsınalyq maqsattaǵy buıymdardy tegin alý, profılaktıkalyq medıtsınalyq tekserýden ótý zańdy quqyǵymen qamtamasyz etilmegen.
«Baıqońyr turǵyndarynda qoljetimdi joǵary mamandandyrylǵan medıtsınalyq kómekti alý múmkindigi joq. Bul múgedek adamdardyń ómiriniń jáne jalpy ómir súrý sapasynyń tómendeýi qaýpin ulǵaıtady. Qoldanystaǵy kelisimge ózgerister engizý týraly hattama jobasy Baıqońyr qalasynyń, Tóretam jáne Aqaı kentterinde turatyn QR azamattaryna ulttyq zańnamaǵa sáıkes, Qazaqstan densaýlyq saqtaý mekemelerimen medıtsınalyq qyzmet kórsetýge múmkindik beredi», - dep naqtylady mınıstr Eljan Birtanov.
Sonymen qatar, mınıstr 2016 jyldyń 12 tamyzynda Baıqońyr qalasynda Qyzylorda oblystyq medıtsınalyq ortalyǵynyń fılıaly paıdalanýǵa berilgenin eske salyp ótti.
Sondaı-aq, 2018 jylǵy qańtardan bastap qalada 30 myń adamǵa qyzmet kórsetetin emhana ashyldy. Qazirgi ýaqytta bul emhanaǵa 19 myńnan astam turǵyn tirkelgen. 2019 jyly emhanada hırýrgııa jáne jansaqtaý bólimshesin ashý josparlanyp otyr.
«Alaıda Baıqońyr qalasynyń aýmaǵyndaǵy qazaqstandyq medıtsınalyq uıymdardyń qyzmet kórsetý quqyǵyn bekitý - tek zańnamaǵa ózgerister engizý týraly hattama kúshine engennen keıin múmkin bolady. Zań jobasy teris áleýmettik-ekonomıkalyq, quqyqtyq saldarǵa alyp kelmeıdi», - dedi E.Birtanov.