Baıqońyrdaǵy qazaqstandyqtar memleketten tolyq medıtsınalyq kómek alatyn boldy
Qyzylorda oblystyq Densaýlyq saqtaý basqarmasynyń basshysy Aqmaral Álnazarovanyń aıtýynsha, QR Parlamenti Senatynda «2009 jylǵy qarashadaǵy Qazaqstan Respýblıkasy Úkimeti men Reseı Federatsııasy Úkimeti arasynda «Baıqońyr» keshenin jalǵa alý jaǵdaıynda ǵarysh aılaǵynyń personalyna, Baıqońyr qalasynyń, Tóretam jáne Aqaı kentteriniń turǵyndaryna medıtsınalyq qyzmet kórsetý tártibi týraly kelisimge ózgerister engizý týraly hattama» ratıfıkatsııalandy.
Buryn Baıqońyrdaǵy qazaqstandyq azamattarǵa beriletin medıtsınalyq kómektiń erekshelikteri boıynsha el azamattary tegin medıtsınalyq kómekti, dárilik zattar men medıtsınalyq maqsattaǵy buıymdardy tegin alý, profılaktıkalyq medıtsınalyq tekserýden ótý zańdy quqyǵy qamtamasyz etilmegen edi. Qoldanysqa engen zańnama tártibi boıynsha endi bul kómekterdi elimizdiń densaýlyq mekemeleri atqara bastady.
Baıqońyrda oblystyq medıtsınalyq ortalyǵynyń fılıaly 2016 jyly ashyldy. Ol qala turǵyndarymen qatar Tóretam jáne Aqaı eldi mekenderine, Aral, Qazaly, Qarmaqshy aýdandary turǵyndaryna da qyzmet kórsetedi.
«Búgingi kúni fılıalda 60 oryndyq terapııa bólimi men 20 oryndyq kúndizgi statsıonar turǵyndarǵa em júrgizip keledi. Jergilikti bıýdjet tarapynan emhana qajetti qural-jabdyqtarmen qamatamasyz etilgen. Degenmen ázirge bizdiń emhana kórsete almaıtyn keıbir kómekterdi reseılik medıtsınalyq uıymdar joldama boıynsha atqarady. Atap aıtqanda, Reseı tarapynan hırýrgııalyq, ınfektsııalyq, týberkýlez jáne jedel járdem sekildi kómek túrleri kórsetiledi», - dedi Aqmaral Álnazarova.
Aldaǵy ýaqytta Baıqońyr qalasynyń irgesinde oryn tepken Aqaı, Tóretam turǵyndaryn qoljetimdi medıtsınalyq kómekpen qamtamasyz etýge mán berilip otyr. Osy maqsatta Tóretam emhanasy men Aqaı aýyldyq aýrýhanasyn oblystyq medıtsınalyq ortalyǵynyń Baıqońyr fılıalyna qosý josparlanyp otyr. Eldi mekenderdiń turǵyndary sol maqsatta tirkelip jatyr.
«Aldaǵy jyldyń qańtar aıynan bastap oblystyq medtsınalyq ortalyǵynyń Baıqońyr fılıalynda kardıoreabılıtatsııa bólimderi ashylatyn bolady. Odan bólek shaqyrýlarǵa jedel qyzmet kórsetý úshin emhanadan jedel medıtsınalyq kómek bólimin ashý josparda tur. Sondaı-aq, fılıalǵa kompıýterlik tomograf satyp alý oılastyrylyp otyr», - dedi A.Álnazarova.