Baıqońyrdaǵy Qazaqstan azamattarynyń áleýmettik máselelerin sheshý úshin birqatar sharalardy atqarý qajet– B. Dosmanbetov

«Reseı Federatsııasy jalǵa alǵan Baıqońyr qalasy men Tóretam stansasy, Aqaı eldi mekenindegi turǵyndarǵa medıtsınalyq kómek kórsetý tártibi týraly» Qazaqstan men Reseı arasyndaǵy 2009 jylǵy 17 qarashada qol qoıylǵan Kelisimniń 4-babynyń 2-shi jáne 3-shi tarmaqshalaryna sáıkes halyqqa kórsetiletin medıtsınalyq qyzmet Qazaqstan bıýdjeti esebinen el zańnamalaryna saı tegin medıtsınalyq kómektiń kepildik berilgen kóleminde ǵana tólenedi. Osyǵan sáıkes, 2009 jyldyń 29 jeltoqsanynda Qazaqstan Respýblıkasy Densaýlyq saqtaý mınıstrliginiń Medıtsınalyq qyzmetke aqy tóleý komıteti men Reseıdiń Federaldyq medıko-bıologııalyq agenttiginiń №1-shi Ortalyq medıko-sanıtarlyq bólimi arasynda kelisimshart jasalynǵan bolatyn. Biraq, «Halyq densaýlyǵy jáne densaýlyq saqtaý júıesi týraly» Qazaqstan Respýblıkasy Kodeksiniń 2010 jyldan bastap qoldanysqa enýine baılanysty, aýrýdyń birneshe túrleri: psıhıkalyq, ınfektsııalyq aýrýlar, týberkýlez, áskerge shaqyrý kezindegi tekserýler tegin medıtsınalyq kómek kórsetýdiń tizbesine enbeı qalǵan», - deıdi senator.

Onyń aıtýnysha, Reseıdiń medıtsınalyq mekemeleri óz zańymen, Qazaqstannyń mekemeleri Qazaqstan zańdary aıasynda jumys isteıtin bolǵandyqtan qarjylandyrýda, kórsetilgen qyzmettiń sapasyn tekserý kezinde birneshe kelispeýshilikter kezdesken. Sondyqtan da depýtattyń pikirinshe, kemshilikterdi ornyna keltirý maqsatynda ekijaqty jasalynǵan kelisim shartqa tıisti ózgertýler engizý qajet.

Budan bólek, B. Dosmanbetov áleýmettik máseleler problemasyna da nazar aýdarady. «Baıqońyr qalasynda turaqty turatyn turǵyndar Qazaqstan Úkimeti men Reseı Úkimeti arasyndaǵy 1996 jylǵy 27 sáýirde jasalynǵan «QR Baıqońyr qalasy turǵyndarynyń zeınetaqy quqyǵyna kepildigi týraly» kelisimge sáıkes, qaı eldiń azamaty ekenine qaramastan zeınetaqymen qamtamasyz etilýi Reseı zańnamasymen júzege asyrylady. Degenmen, Tóretam, Aqaı eldi mekenderinde turyp Baıqońyrdaǵy Reseı mekemelerinde jumys isteıtin, sonymen qatar Baıqońyrdan kóshkisi keletin QR azamattaryna zeınetaqy taǵaıyndalýynda sheshilmegen máseleler de barshylyq. Atap aıtsaq, zeınetaqyny taǵaıyndaýǵa qajetti jumyskerdiń reseı rýblimen kórsetilgen jalaqysy týraly anyqtamasy qabyldanbaıdy. Sebebi, birinshiden, jumyskerdiń jalaqysynan Qazaqstan Respýblıkasy jınaqtaýshy zeınetaqy qoryna mindetti zeınetaqy tólemderi tólenbeıdi, ekinshiden, jalaqysy reseı rýbilimen kórsetilgendikten olarǵa eń tómengi zeınetaqy taǵaıyndalady», - deıdi senator.

Sonymen qatar, B. Dosmanbetov Baıqońyr qalasynyń atqarý uıymdary Reseı Úkimetiniń sheshimimen qurylatynyn da tilge tıek etti. Sondyqtan da, qaladaǵy turǵyn úı kommýnaldyq tarıfteri Qyzylorda oblysynyń tarıfterine qaraǵanda joǵary, azyq-túlik taýarlarynyń baǵasy Reseıdiń ortalyq aımaqtarynyń baǵalarymen sáıkes bolyp otyr. Baıqońyr qalasynyń kúnkóris deńgeıi Qyzylorda oblysy úshin bekitilgen normadan 2 ese joǵary. Sonymen qatar, Reseı azamattarynyń jalaqysy da anaǵurlym joǵary.

«Osy jaǵdaılardyń bári Qazaqstan azamattarynyń áleýmettik jaǵdaıyna teris yqpalyn tıgizedi. Bizdiń azamattardyń kópshiligi turmystyq qyzmet kórsetý salasynda (tómen jalaqymen) jumys isteıtinin, otbasynda 2-3 baladan baryn eskersek, jalaqysynyń biraz bóliginiń kommýnaldyq tólemder men azyq-túlikke jumsalatyny belgili. Osyǵan oraı, qazaqstandyqtardyń áleýmettik qynjylystaryn sheshý maqsatynda birqatar sharalar atqarylsa ıgi. Atap aıtsaq, birinshiden Baıqońyrda turatyn Qazaqstan azamattarynyń zeınetaqymen tıisti deńgeıde qamtamasyz etilýin Reseı jaǵymen kelisip sheshý. Ekinshiden, «Qazaqstan Respýblıkasyndaǵy arnaýly memlekettik járdemaqy týraly» QR Zańyna tıisti tolyqtyrý qajet. Úshinshiden, qalada óz aldyna oblystyń qalalyq jumyspen qamtý jáne áleýmettik baǵdarlamalar bóliminiń ashylýy qajet», - dedi depýtat B. Dosmanbetov.