Baıqońyrdaǵy qazaq mektepterin Qazaqstannyń qarjylandyrýyna berýge pedagogtardyń ózderi qarsy bolyp otyr

Bul týraly búgin QR Parlamenti Májilisinde «QR men RF arasyndaǵy «Baıqońyr» keshenin tıimdi paıdalaný jónindegi yntymaqtastyqty damytý týraly kelisimdi ratıfıkatsııalaý týraly» zań jobasyn talqylaý barysynda málim boldy, dep habarlaıdy QazAqparat.

Toqtala ketetin jaıt, kelisim jobasyn talqylaý barysynda depýtattar Baıqońyr qalasyndaǵy reseı standarty boıynsha qazaq tilinde bilim beretin mektepterdiń jaǵdaıyna alańdaýshylyq bildirgen edi. Qalada qazirgi tańda jalpyǵa bilim beretin 14 mektep jumys istese, sonyń 6-ýy qazaq tilinde oqytatynyn mektep eken. Degenmen, bul oqý oshaqtarynyń barlyǵy Reseı tarapynan qarjylanatyndyqtan, sol eldiń standarttary engizilip otyrǵanǵa uqsaıdy. Osyǵan oraı, depýtattar bul mektepterdi Qazaqstannyń qarjylandyrýyna alý qajettigin de kótergen bolatyn.

«Baıqońyrdaǵy 6 qazaq mektebin óz balansymyzǵa alyp, qarjylandyrý qajettigi týraly másele oryndy kóterilip otyr. Bundaı usynysty biz birneshe márte Úkimetke de engizgen edik, bıyl taǵy da bul usynysty ázirledik. Esepke salsaq, Baıqońyrdaǵy 6 qazaq mektebin qarjylandyrýǵa bıýdjetten 1 mlrd. 530 mln. 533 myń teńge qarjy qajet etiledi. Degenmen, bunda nazar aýdaratyn taǵy bir másele bar. Jalpy, osy mektepterdi Reseıden alyp, Qazaqstanǵa berýge sol óńirdegi pedagogıka qaýymdastyǵynyń ózderi qarsy bolyp otyr. Ondaǵy sebep - jalaqynyń aıyrmashylyǵyna qatysty bolyp tabylady. Máselen, Qazaqstandaǵy mektep muǵaliminiń jalaqysy orta eseppen alǵanda 37 myń 920 teńgeni, ıaǵnı 252 dollardy quraıdy. Al qazirgi Reseı qarjylandyryp otyrǵan mektepterdegi qazaqstandyq muǵalimder 17 myń reseı rýbli, ıaǵnı 720 dollar kóleminde jalaqy alady. Bundaǵy jalaqy aıyrmashylyǵy 3 esege deıin jetip otyr», dedi jıyn barysynda Bilim jáne ǵylym mınıstrliginiń ókili.