Baıqońyrdaǵy emhana jaqyn mańdaǵy aýyl turǵyndaryna da qyzmet kórsetetin boldy

BAIQOŃYR. QazAqparat - Qarmaqshy aýdanyna qarasty Aqaı men Tóretam eldi mekenderiniń turǵyndary endi Baıqońyr qalasynda ashylǵan emhana qyzmetin paıdalana alatyn boldy. Emhana endi oblystyq medıtsına ortalyǵynyń Baıqońyrdaǵy fılıaly esebinde qyzmet kórsetedi, dep habarlaıdy QazAqparat tilshisi Qyzylorda oblysy ákimi baspasóz qyzmetine silteme jasap.

Osy ýaqytqa deıin Aqaı men Tóretam turǵyndary 90 shaqyrym qashyqtyqta oryn tepken Qarmaqshy aýdanynyń ortalyǵy - Josaly kentindegi medıtsınalyq qyzmetti paıdalanýǵa májbúr edi.

Tegin medıtsınalyq kómektiń kepildik berilgen kólemi aıasynda turǵyndarǵa tegin medıtsınalyq kómek kórsetý maqsatynda 2018 jyldyń 1 qańtarynan bastap oblystyq medıtsına ortalyǵynyń Baıqońyrdaǵy fılıalynda Qazaqstan azamattary úshin emhana jumys isteı bastady.
Esterińizge sala keteıik, 15 qyrkúıekten bastap respýblıka boıynsha turǵyndardy emhanalarǵa tirkeý jumystary júrgizilýde. Baıqońyr qalasynda ashylǵan emhana bul naýqanǵa alǵash ret qatysyp otyr.

Medıtsınalyq ortalyq qajetti mamandarmen tolyǵymen qamtamasyz etilgen. Oblystyq densaýlyq saqtaý basqarmasynyń málimetine sáıkes, qazir QR azamattary, onyń ishinde zeınetkerler, 18 jasqa deıingi balalar jáne Baıqońyr qalasynda turatyn jumyssyz azamattar oblystyq medıtsınalyq ortalyǵy fılıalynyń qyzmetin paıdalana alady.

Qazirgi tańda, vaktsınatsııa jasaý, ambýlatorııalyq deńgeıdegi tegin dári-dármektermen qamtý, dıspanserlik naýqastardy dınamıkalyq baqylaý, aldyn-ala tekserýden ótkizý atap aıtsaq, áskerge shaqyrý aldyndaǵy jáne jasqa tolǵanǵa deıingi balalardy medıtsınalyq tekserýden ótkizý sııaqty birqatar problemalyq máselelerdi sheshý úshin jumys toby quryldy.