Baıqońyrdaǵy apat: «Soıýz MS-10» zymyranynyń ekinshi satysy qaıda qulaýy múmkin

ASTANA. QazAqparat - Apatqa ushyraǵan «Soıýz MS-10» kemesiniń ekinshi satysy Jezqazǵannan 30-35 shaqyrym jerge qulaýy múmin. Bul týraly búgin QR ІІM Tótenshe jaǵdaılar komıtetiniń tóraǵasy Vladımır Bekker aıtty, dep habarlaıdy QazAqparat tilshisi.

«Apatqa ushyraǵan ǵarysh kemesiniń ekinshi satysynyń qazirgi ýaqytta qaı jerde qulaǵany belgisiz. Eldi mekenderden, jergilik atqarýshy organdardan jáne ózge de tulǵalardan azamattyq qorǵanys organdaryna qandaı da bir aqparat kelip túsken joq», - dedi Vladımır Bekker.

Onyń aıtýynsha, izdeý-qutqarý toby ǵarysh kemesiniń ekinshi satysynyń qulaǵan jerin anyqtaý jumystaryn júrgizip jatyr. Atalǵan ǵarysh kemesine otyn retinde kerosın men ottek paıdalanylǵan.

«Ǵarysh kemesiniń ekinshi satysy shamamen Qaraǵandy oblysynyń Jezqazǵan qalasy mańynda qulaýy yqtımal. Roskosmos mamandarymen sóıleskenimizde, olar zymyran bóshegi qulaýy múmkin aýdandy atady.  ıAǵnı, Jezqazǵan qalasynan 30-35 shaqyrym jerge qulaýy múmkin. Zymyran bólshekteri qulaıtyn traektorııada eshqandaı eldi meken joq. Zymyrannyń ekinshi bólshegi eldi mekenge qulaǵan bolsa, onda osy ýaqytqa deıin aqparat bolar edi», - dedi komıtet tóraǵasy.

Buǵan deıin ǵarysherlerdiń din-aman ekendigin, qazirgi ýaqytta olardy izdeý-qutqarý toby Baıqońyr ǵarysh aılaǵyna apara jatqanyn habarlaǵan bolatynbyz. 

Aıta keteıik, búgin 14 saǵat 40 mınýt 15 sekýndta Baıqońyr ǵarysh aılaǵynyń Gagarın start alańynan orbıtaǵa basqarylatyn kóliktik «Soıýz MS-10» kemesin alyp shyǵýy tıis «Soıýz FG» zymyran tasyǵyshy ushyryldy. Biraq start berilgen soń birneshe mınýttan keıin Roskosmos saıtyndaǵy tikeleı kórsetilim úzilip, dıktor «zymyran tasyǵyshtyń apatqa ushyraǵanyn» habarlaǵan edi. 

«Soıýz MS-10» kemesiniń bortynda Roskosmos ǵaryshkeri Alekseı Ovchının men NASA ǵaryshkeri Nık Heıg bar.

Sál keıinirek apatqa ushyraǵan zymyrannyń vıdeosy jarııalandy.