Baıqońyrdaǵy 6 qazaq mektebi men 1 balabaqsha qazaqstandyq standartqa tolyq kóshedi

ASTANA. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy Baıqońyr qalasynyń bilim berý uıymdaryn berý týraly kelisimdi ratıfıkatsııalaý týraly» QR Zańyn qabyldady. Atalǵan zań Baıqońyrdaǵy 6 qazaq mektebi men 1 balabaqshany qazaqstandyq standartqa tolyq kóshirý máselesin sheshetin bolady.

Parlament qabyldaǵan zańnyń maqsaty Baıqońyr qalasyndaǵy qazaqstandyq balalarǵa bilim berý jáne bilim berý uıymdarynyń jumys isteýi úshin qolaıly jaǵdaı jasaý bolyp tabylady. Atap aıtqanda, Baıqońyr qalasynyń Reseı Federatsııasynyń ıýrısdıktsııasyndaǵy bilim berý uıymdary Qazaqstan tarapyna, Qazaqstan Respýblıkasynyń ıýrısdıktsııasyna beriledi. Sonymen qatar, kommýnaldyq kórsetiletin qyzmetterge aqy tóleýdi qosa alǵanda, bilim berý uıymdaryn qarjylandyrý Qyzylorda oblysynyń bıýdjetine Qazaqstan Úkimeti belgilegen tártippen respýblıkalyq bıýdjetten transfertter aýdarý arqyly júzege asyrylady.

«Bizdiń mınıstrlikke qazaqstandyq azamattardy Baıqońyr qalasyndaǵy 6 mektep pen 1 balabaqshada Qazaqstannyń memlekettik bilim berý standarttarymen oqytý máselesin sheshý júktelgen bolatyn. Osyǵan oraı, 2014 jyldyń jeltoqsan aıynda Máskeý qalasynda kelisimshartqa qol qoıyldy. Bul kelisim boıynsha 6 mektep pen 1 balabaqsha Qazaqstannyń ıýrısdıktsııasyna ótedi», - dedi Bilim jáne ǵylym mınıstri Aslan Sárinjipov.

Onyń sózine qaraǵanda, Baıqońyr qalasyndaǵy bilim berý mekemeleriniń qazaqstandyq bilim standarttaryna kóshý mezgili 2015 jyldyń qyrkúıeginen bastap júzege asatyny josparlanǵan.

Parlament qabyldaǵan zań Memleket basshysynyń qol qoıýyna joldanady.