Baıqońyrda joǵalǵan ekinshi balany izdeý erteń jalǵasady
Esterińizge sala ketelik, 20 aqpanda Baıqońyr qalasynda jergilikti ýaqyt boıynsha saǵat 10.30 shamasynda eki oqýshy joǵalyp ketken. 21 aqpanynan bastap Reseı Іshki ister mınıstrligi «Baıqońyr» keshenindegi basqarmasy, QR Іshki ister mınıstrligi Baıqońyr qalasyndaǵy ókildigi jáne QR ishki istep organdary qyzmetkerleri joǵalǵan balalardy izdeý is-sharalaryn júrgizdi. Bul maqsatta Qyzylorda qalasynan arnaıy top Baıqońyr qalasyna jetti. Sondaı-aq, izdeý sharalaryna erikti azamattar da kómek kórsetti. Syrdarııa ózenin tikushaqpen baqylaý barysynda olardyń biriniń denesi tabylyp, súńgýirlerimen ózen jaǵasyna shyǵaryldy. Qyzylorda oblystyq tótenshe jaǵdaılar departamentiniń habaralýynsha, ekinshi balany izdeý erteń jalǵasady.
Oblys ákimi Gúlshara Ábdiqalyqova Baıqońyr qalasyna arnaıy keldi. Qaıtys bolǵan Erhan Anastyń ata-anasymen arnaıy kezdesip, qaıǵysyna ortaqtasyp, kóńil aıtty.
«Oblys ákimi Baıqońyr qalasy ákimshiliginiń basshysy Konstantın Býsygınmen kezdesti. Kezdesý barysynda joǵalǵan balalardy izdeý boıynsha atqarylǵan jáne josparlanǵan is-sharalar talqylandy.
Budan bólek, oblys ákimi Baıqońyr qalasynda quqyq qorǵaý organdary ókilderi, tótenshe jaǵdaı qyzmetkerleri, Qarmaqshy aýdany ákiminiń orynbasary jáne mektep dırektorlarynyń qatysýymen jınalys ótkizdi. Jınalys barysynda aımaq basshysy balalardyń qaýipsizdigin saqtaý maqsatynda ata-analar arasynda túsindirý jumystaryn uıymdastyrýdy júktedi. Qazirgi ýaqytta joǵalǵan Nuráli Orazbaevty izdestirý boıynsha sharalar jalǵasýda», - dedi Qyzylorda oblys ákiminiń baspasóz qyzmeti.
