Baıqońyrda toǵyz jasar bala basseınge batyp ketti

BAIQOŃYR. QazAqparat - 22 jeltoqsan kúni Baıqońyrdaǵy «Orıon» basseıninde qaıǵyly oqıǵa boldy - toǵyz jasar bala sýǵa túsý kezinde qaıtys boldy. Bul týraly balanyń ólimine qatysty tergeýdi bastaǵan «Baıqońyr» kesheniniń prokýratýrasy habarlady, dep habarlaıdy QazAqparat tilshisi.

22 jeltoqsan kúni saǵat 14:40 shamasynda balanyń Orıon basseıninde bolǵany anyqtaldy.

Júzý kezinde basseınge túsýge qarsy kórsetilimderi joqtyǵyn rastaıtyn medıtsınalyq qujaty bar bala kenetten aýyryp, oǵan basseın nusqaýshylary men medıtsına qyzmetkerleri dereý kómek kórsete bastady.

Shaqyrý boıynsha kelgen jedel járdem qyzmetkerleri balanyń qaıtys bolǵanyn anyqtady.

Qazirgi ýaqytta ólim sebebin anyqtaý maqsatynda barlyq qajetti zerthanalyq zertteýler men sot-medıtsınalyq saraptamasy taǵaıyndaldy.

Sot-medıtsınalyq sarapshysynyń aldyn ala qorytyndysy boıynsha balanyń ólimi jalpy aýrýdyń saldarynan bolǵan, sýǵa batý belgileri joq.

Atalǵan fakti boıynsha qaıǵyly oqıǵanyń mán-jaıyn jan-jaqty tekserý maqsatynda RF Tergeý komıtetiniń «Baıqońyr» kesheni boıynsha tergeý basqarmasy qylmystyq is qozǵady.

Atalǵan fakt boıynsha keshen prokýratýrasy tekseris júrgizip jatyr.

Onyń aıasynda «Orıon basseıni» memlekettik bıýdjettik mekemesiniń laýazymdy tulǵalarynyń júzý sabaqtaryn ótkizý barysynda kámeletke tolmaǵandardy qadaǵalaýdy uıymdastyrý jáne júzege asyrý áreketterine (áreketsizdigine) baǵa beriledi.