Baıqońyrda «Progress MS-13» júk kemesi ushý keshenine qoıyldy

BAIQOŃYR. QazAqparat – Baıqońyr ǵarysh aılaǵynda «Soıýz-2.1a» zymyran-tasyǵyshy «Progress MS-13» júk kemesimen birge ushý keshenine qoıyldy, dep habarlaıdy QazAqparat tilshisi.

«Qazirgi tańda zymyran-tasyǵysh kememen birge Baıqońyr ǵarysh aılaǵyndaǵy № 31 ushý keshenine qoıyldy. Reseılik zymyran-ǵarysh salasynyń kásiporyn mamandary birinshi ushý kúniniń kestesi boıynsha óz jumystaryna kiristi. Búgin júk kemesiniń júıeleri men agregattaryna, zymyran-tasyǵysh pen ushý keshenine avtonomdyq synaq júrip jatyr», - dep habarlady Roskosmos baspasóz qyzmetinen.

«Progress MS-13» júk kemesi «Soıýz-2.1a» zymyran-tasyǵyshymen birge 2019 jyldyń 6 jeltoqsanynda Nur-Sultan ýaqytymen 15 saǵat 34 mınýtta ushyrylady dep josparlanýda.

Budan buryn habarlanǵandaı, ǵarysh kemesi 1 jeltoqsanda kókke kóterilýi tıis edi, adaıda ol kemeniń qosymsha tekserý jumystaryna baılanysty keıinge qaldyryldy.

Ǵaryshtyq júk kemesi Halyqaralyq ǵarysh stansasyna otyn, ottegi, ǵylymı tájirıbelerge arnalǵan qural-jabdyqtar, medıtsınalyq zattar, tamaq pen sý, ekıpajǵa habarlama jetkizýi kerek.

Avtor: Sara Qabıqyzy