Baıqońyrda qazaqstandyq dárigerlerdiń eńbekaqysy reseıliktermen teńestirildi
QR Densaýlyq saqtaý vıtse-mınıstri Alekseı Tsoıdyń sózine qaraǵanda, Baıqońyrda Qazaqstan azamattaryna medıtsınalyq kómekti kórsetýge qatysty sharalar osy kezde jetkiliksiz iske asyrylýda. Osylaısha, reseılik medıtsınalyq uıymdary usynǵan QR azamattaryna medıtsınalyq kómek Qazaqstan aýmaǵyndaǵy tegin kómektiń kepildik berilgen deńgeıine sáıkes kelmeıdi. Elimiz azamattary skrınıngtik zertteýlermen qamtylmaǵan.
«Qazirgi kezde atalǵan uıym (Baıqońyrdaǵy oblystyq medıtsınalyq ortalyq fılıaly) shyǵynǵa tap bolýda, sebebi ol qanatqaqty formatta jumys istep tur. Osy oraıda, bul uıymdy tolyqqandy iske qosý úshin biz qujattyń ratıfıkatsııasyn kútip otyrmyz. Uıym fılıaldan bólinip, Baıqońyrda bólek uıym mártebesine ıe bolady. Hattama ratıfıkatsııalanǵan sátten bastap, birtindep atalǵan qyzmetterdi bizdiń medıtsınalyq uıymmen kórsetiletin bolady. Sáıkesinshe, onyń bıýdjeti ósedi», - dedi A. Tsoı.
Onyń atap ótýinshe, zańnamada qarastyrylǵandaı, Baıqońyrdaǵy Qazaqstan azamattary barlyq medıtsınalyq kómekti alatyn bolady. Qazaqstandyq medıtsınalyq uıymdardaǵy qyzmetkerlerdiń eńbekaqy deńgeıi reseılik densaýlyq saqtaý mekemeleriniń jalaqysyna teńestirilgen. Bul turǵyda kóptegen dárigerler reseılik uıymdardan qazaqstandyq uıymdarǵa aýysýda. Munymen qosa, qazaqstandyq medıtsınalyq uıymdarda qazirgi zamanǵy qurylǵylar men jabdyqtar ornatylýda.
Aıta keteıik, bul zań jobasy bıyl maýsym aıynda Parlament Májilisinde maquldanǵan bolatyn.
Budan buryn habarlanǵandaı, Baıqońyr turǵyndarynda qoljetimdi joǵary mamandandyrylǵan medıtsınalyq kómekti alý múmkindigi joq. Qoldanystaǵy kelisimge ózgerister engizý týraly hattama jobasy Baıqońyr qalasynyń, Tóretam jáne Aqaı kentterinde turatyn QR azamattaryna ulttyq zańnamaǵa sáıkes, Qazaqstan densaýlyq saqtaý mekemelerimen medıtsınalyq qyzmet kórsetýge múmkindik beredi.
Esterińizge sala keteıik, 2016 jyldyń 12 tamyzynda Baıqońyr qalasynda Qyzylorda oblystyq medıtsınalyq ortalyǵynyń fılıaly paıdalanýǵa berilgen bolatyn. Sonymen qatar, 2018 jylǵy qańtardan bastap qalada 30 myń adamǵa qyzmet kórsetetin emhana ashyldy. Qazirgi ýaqytta bul emhanaǵa 17 myńnan astam turǵyn tirkelgen. 2019 jyly operatsııalyq bólimdi jáne jansaqtaý bólimshesin uıymdastyrý men hırýrgııany ashý josparlanyp otyr.
Alaıda Baıqońyr qalasynyń aýmaǵyndaǵy qazaqstandyq medıtsınalyq uıymdardyń qyzmet kórsetý quqyǵyn bekitý - tek zańnamaǵa ózgerister engizý týraly hattama kúshine engennen keıin múmkin bolady. Zań jobasy teris áleýmettik-ekonomıkalyq, quqyqtyq saldarǵa alyp kelmeıdi.