Baıqońyrda Qazaqstan jáne Reseı mamandary «qulaǵan» raketanyń qaldyqtaryn izdedi
BAIQOŃYR. QazAqparat – «Baıqońyrdan» ǵarysh apparatyn ushyrý kezinde oryn alýy múmkin apatty jaǵdaıda shuǵyl is-qımyldardy pysyqtaý boıynsha qazaqstandyq-reseılik jattyǵýlar ótti, dep habarlaıdy QazAqparat tilshisi.
«Baıqońyr» keshenindegi QR Prezıdentiniń arnaıy ókildiginiń apparatynan málim etkendeı, Qyzylorda oblysynyń Qarmaqshy aýdanynda ótken komandalyq-shtabtyq oqý-jattyǵýyna «Roskosmos» memlekettik korporatsııasynyń, Reseı Tótenshe jaǵdaılar mınıstrligi Órtke qarsy arnaıy basqarmasynyń, Reseıdiń Federaldyq medıtsınalyq-bıologııalyq agenttiginiń, qazaqstandyq «Ǵarysh Ekologııa» respýblıkalyq memlekettik kásipornynyń, Qyzylorda oblystyq Tótenshe jaǵdaılar departamenti men jergilikti atqarýshy organdardyń ókilderi qatysty.
Jattyǵýǵa qatysýshylar zymyran-tasyǵysh fragmentteri qulaǵan aýmaqty izdep taýyp, oǵan kúzet qoıdy, ekologtar aýa men topyraqtan synamalar aldy, zaqymdanǵan aýmaqtyń kólemin anyqtap, topyraqty ýytsyzdandyrýmen jáne qalpyna keltirýmen aınalysty. Sondaı-aq halyqty evakýatsııalaý, aýylsharýashylyq jáne úı janýarlaryn dıspanserızatsııalaý boıynsha is-qımyldar pysyqtaldy.
Roskosmos tarapynan jattyǵýǵa qatysqan «ıÝjnyı» ǵarysh ortalyǵynyń jerústi izdeý toby – bul «Baıqońyr» aılaǵynan ǵaryshtyq maqsattaǵy zymyrandy ushyrý aldynda fılıal bólimsheleriniń qyzmetkerlerinen jasaqtalatyn shtattan tys apattyq-qutqarý qurylymynyń bir bóligi. Toptyń mindeti –apat bolǵan jaǵdaıda ushý trassasy boıymen ǵarysh aılaǵynan 150 shaqyrymǵa deıingi qashyqtyqta zymyran-tasyǵyshtyń qulaǵan fragmentterin izdeý.
«Baıqońyrdan» jasalǵan ushyrylymdar sátsiz ótken jaǵdaıda shuǵyl top qurylady. Toptyń jumysy - zymyran-tasyǵysh fragmentteri qulaǵan jerde birinshi kezektegi is-sharalardy uıymdastyrý jáne Qazaqstan Respýblıkasynyń bılik organdarymen ózara áreket etý.
Al «Ǵarysh Ekologııa» Ǵylymı-zertteý ortalyǵy» RMK-nyń negizgi fýnktsııasy zymyran-ǵaryshtyq qyzmettiń qorshaǵan ortaǵa jáne QR halqyna zııandy áserin azaıtý úshin baǵalaý, boljaý jáne usynymdar ázirleý boıynsha jumystardy uıymdastyrý jáne ótkizý bolyp tabylady.
Avtory Sara Qabıqyzy
