Baıqońyrda Qazaqstan tarapynan 3 balabaqsha salynady
Qyzylorda oblystyq bilim basqarmasynyń basshysy Maıra Meldebekovanyń aıtýynsha, Baıqońyrda qyzmet etip turǵan 13 balabaqshanyń nebári 1-eýi ǵana qazaqstandyq bilim standarty boıynsha jumys jasaıdy. Mektep jasyna deıingi balalar bilim oshaǵyna daıyn bolýy úshin bilim men tárbıe qazaqstandyq standart boıynsha berilýi tıis.
«Qazir Baıqońyr qalasynda bizdiń elimizdiń bilim standarttarymen jumys isteıtin 8 orta mektep bar. Onda sabaqtar qazaqsha júrgiziledi. Jalpy, Baıqońyrda 1500 qazaqstandyq bala Reseı standarty boıynsha bilim alyp keledi. Qazirgi kezde olardy qazaqstandyq bilim berý júıesine kóshirý josparlanyp otyr», - dedi oblystyq bilim basqarmasynyń basshysy Maıra Meldebekova.
Qazirgi tańda Baıqońyrda 600 oryndyq jańa mektep salý nemese taǵy bir mektepti qazaqstandyq standartqa kóshirý týraly usynys daıyndalýda. Ol úkimetaralyq kelisimder aıasynda sheshiledi.