Baıqońyrda karantın qyrkúıektiń sońyna deıin sozyldy

BAIOŃYR. QazAqparat – Baıqońyr qalalyq ákimshiligi basshysynyń qaýlysyna sáıkes, koronavırýsqa baılanysty shekteý sharalary 2021 jyldyń 27 qyrkúıegine deıin sozyldy, dep habarlaıdy QazAqparat tilshisi.

Qalalyq jedel shtabtyń málimetinshe, 2021 jyldyń 13 qyrkúıeginen bastap jabyq tamaqtaný oryndarynda adamdar sany 50%-dan aspaýy tıis, ústelderdiń araqashyqtyǵy 1,5 metr jáne bir ústeldegi adamdar sany tórteýden aspaý kerek. Sondaı-aq, ashyq aspan astynda saltanatty, mádenı, sporttyq sharalar ótkizýge ruqsat etildi.

«Baıqońyr» ǵarysh aılaǵyna 18 jastan asqan adamdarǵa zymyran-tasyǵyshtardy jáne ǵarysh qurylǵylaryn kórýge arnalǵan ekskýrsııalyq týr jasaýǵa bolady. Balalarǵa dene shynyqtyrý sabaqtaryna qatysýǵa jáne jabyq sport nysandaryna sportpen aınalysýǵa, sonyń ishinde basseınge ruqsat etildi

Baıqońyrǵa oqýǵa, jumys babymen, asqa kelýshilerden PTR test talap etiledi. Mektepke deıingi bilim berý mekemeleriniń qyzmeti shtattyq rejımde júrgiziledi. Soǵan qaramastan, Baıqońyrdaǵy koronavırýs jaǵdaıy kúrdeli bolyp otyr. Resmı aqparatqa sáıkes, 2021 jyldyń 10 qyrkúıeginde Baıqońyr qalasynda 2395 adam KVI-ge shaldyqqan. 2 apta burynǵy jaǵdaımen salystyrǵanda epıdemıologııalyq jaǵdaı turaqtalǵan.

Avtory: Sara Qabıqyzy