Baıqońyrda karantın 1 aqpanǵa deıin uzartyldy
BAIQOŃYR. QazAqparat – Baıqońyr qalasy ákimshiligi basshysynyń qaýlysymen shahar aýmaǵynda koronavırýs ınfektsııana qatysty shekteý sharalary 1 aqpanǵa deıin uzartyldy, dep habarlaıdy QazAqparat tilshisi.
Buǵan deıin Baıqońyrda karantın 2021 jyldyń 18 qańtaryna deıin engizilgen bolatyn. Epıdahýaldyń órshýine syrttan ákelingen jańa jaǵdaılar sebep bolǵan.
Reseı federaldy medıtsınalyq-bıologııalyq agenttiginiń «Baıqońyr» kesheni óńirlik basqarmasynyń málimetinshe, 2020 jyldyń 26 jeltoqsanynan 2021 jyldyń 15 qańtar aralyǵynda 38 baıqońyrlyq turǵyn koronavırýs juqtyrǵan. Tirkelgen jaǵdaılardyń jalpy sany 1124-ten 1162 adamǵa deıin artty. Infektsııalyq statsıonarda 7 adam emdelip jatyr, sońǵy úsh aptada ólim jaǵdaılary bolǵan joq. Pandemııa bastalǵannan beri Baıqońyrdyń 70 turǵyny koronavırýs aýrýynan qaıtys boldy.
Baıqońyrda qoldanystaǵy shekteý sharalary saqtalýda. Jedel shtab turǵyndardy jabyq úı-jaılarǵa barǵanda maska rejımin, áleýmettik qashyqtyqty, sanıtarlyq erejeler men jeke gıgıenany qatań saqtaýǵa shaqyrady.
