Baıqońyrda qalany damytý máselesi talqylandy
Jıynda turǵyn úı qurylysy, gazdandyrý, sýmen jabdyqtaý jáne káriz júıelerin jańǵyrtý, joldar men turǵyn úılerdi jóndeý máseleleri aıtyldy.
Oǵan oblys ákimi Qyrymbek Kósherbaev, QR Prezıdenti Ákimshiliginiń memlekettik ınspektory Nurlan Tileshev, QR Qorǵanys jáne aeroǵarysh ónerkásibi mınıstrliginiń qyzmetkerleri, oblystyq jáne aýdandyq máslıhat depýtattary jáne quzyrly mekeme ókilderi qatysty.
Qyrymbek Kósherbaev Baıqońyr qalasynyń birqatar áleýmettik nysandaryn, atap aıtqanda, qurylysy júrip jatqan kópqabatty úıler, gazdandyrylǵan áleýmettik nysandar, Qazaqstan azamattary úshin medıtsınalyq uıymdar men demalys ornynyń jumysymen habardar etti.
«Memleket basshylarynyń tapsyrmasyn oryndaý barysynda ǵarysh aılaǵyn jáne Baıqońyr qalasynyń damýyn qamtamasyz etý úshin kóptegen jumystar atqarylýda. Sonyń biri «Báıterek» birlesken zymyran keshenin qurý boıynsha jumystar júrgizilýde. Baıqońyrǵa úshinshi eldiń ınvestıtsııasyn tartý maqsatynda Qazaqstan, Reseı jáne Birikken Arab Ámirlikteri «Soıýz» ǵarysh ortalyǵyn jańǵyrtý arqyly №1 alańda ǵarysh zymyran keshenin qurý máselesin sheshý úshin birlesken jumys tobyn qurdy», - dedi aımaq basshysy.
Baıqońyrda uzaq merzimdi baǵdarlamany iske asyrý boıynsha aýqymdy jumystar júrgizilip keledi. Degenmen, qala bıýdjeti barlyq máselelerdi júıeli túrde sheshý úshin jetkiliksiz. Reseı Federatsııasyna qarasty degen qalanyń zańnamalyq erekshe mártebesi áleýmettik jobalardy qarjylandyrýǵa múmkindik bermeıdi.
«Baıqońyr Qyzylorda oblysynyń ákimshilik-aýmaqtyq birligi bolmaǵandyqtan, qalanyń damý shyǵyndary oblystyq bıýdjettiń negizgi shyǵyndaryna kirmeıdi. Bul máseleniń mańyzdylyǵyn eskere otyryp, jergilikti bıýdjetten aıryqsha jaǵdaılarda biz turǵyn úı qurylysyn damytýǵa, sondaı-aq, qalanyń sý jáne káriz jelilerin jańǵyrtý men qaıta qurýdyń tehnıkalyq-ekonomıkalyq negizdemesin ázirleýge qarjy bóldik. Qalany damytý úshin respýblıkalyq bıýdjetten qarajat ta bir ret bólinedi», - dedi oblys ákimi.
Sondaı-aq ol Baıqońyrdyń úzdiksiz damýy úshin turaqty qarjylandyrý qajettigin atap ótti.
Osyǵan oraı, oblystyq ekonomıka jáne bıýdjettik josparlaý basqarmasyna Qarjy, Ulttyq ekonomıka, Qorǵanys jáne aeroǵarysh ónerkásibi mınıstrlikterimen Baıqońyr qalasynyń damýyn qarjylandyrý úshin bólek bıýdjettik baǵdarlama qurý jáne Qazaqstan Respýblıkasynyń bıýdjetine áleýmettik-ekonomıkalyq salada ǵarysh aılaǵyn jalǵa alý úshin jyl saıyn Reseı Federatsııasynan tólenetin qarajattyń bóligin Baıqońyr qalasynyń, Tóretam men Aqaı eldi mekenderiniń áleýmettik-ekonomıkalyq damýy úshin bólip berý máselesi boıynsha jumys júrgizý mindetteldi.
«Tóretam men Aqaıdyń damýyn qamtamasyz etý arqyly biz Baıqońyr qalasyn damytamyz, sebebi, keleshekte bul eldi mekender qalanyń shaǵyn aýdandaryna aınalady», - dedi aımaq basshysy.
Eske salaıyq, aǵymdaǵy jyldyń shilde aıyndaǵy jumys sapary barysynda QR Premer-Mınıstriniń orynbasary Asqar Mamın Dmıtrıı Rogozınmen reseılik jáne qazaqstandyq taraptardyń qalany damytýdy qarjylandyrý máselesin naqtylaý qajettigi týraly máseleni kótergen bolatyn.
«Baıqońyr» ǵarysh aılaǵynda birlesken ǵaryshtyq jobalardy júzege asyrý týraly Aeroǵarysh komıteti tóraǵasynyń orynbasary Ǵalymjan Danbaev sóz sóıledi. Sondaı-aq, memlekettik organdardyń basshylary Baıqońyr qalasyn abattandyrý, onyń turǵyndaryn jumyspen qamtý jáne buqaralyq kásipkerlikti damytý boıynsha júrgizilip jatqan jumystar týraly baıandady.
Atap ótken jón, birlesken «Báıterek» Qazaqstan-Reseı jobasy 2022 jyly júzege asyrylady. Qazirgi tańda bul baǵytta qarqyndy jumystar júrgizilip jatyr. Sondaı-aq, Baıqońyr kesheninde medıtsına týraly kelisimge ózgertýler engizý, jer ýchaskelerin bıznes-jobalardy iske asyrý úshin jalǵa berý jáne Tóretam jáne Aqaı eldi mekenderin damytý máseleleri boıynsha hattamalarǵa qol qoıyldy.
Búgingi tańda qala ákimshiligi «Roskosmos» korporatsııasynyń qoldaýymen qala aýmaǵyn abattandyrý, joldardy jóndeý, turǵyn úılerdi gazdandyrý jumystaryn júrgizýde. Óz kezeginde oblys ákimdigi Úkimettiń qoldaýymen 5 kóp páterli úıdiń qurylysyn bastady, sý qubyry men káriz júıesin kommýnaldyq menshikke qabyldap, olardy jetildirýge baılanysty tehnıkalyq-ekonomıkalyq negizdemelerin daıyndap, qazaqstandyq mektepter men emhanalardy kógildir otynmen jabdyqtady. Sondaı-aq, osyǵan deıin Baıqońyrdaǵy 5 mektep túlekteri UBT-ny tapsyrýda qıyndyqtar oryn almaýy úshin qazaqstandyq bilim berý standartyna kóshti.