Baıqońyrda geptıldi shuǵyl zalalsyzdandyrý máselesi áli qamtylmaı otyr - I. Adyrbekov
Búgin QR Parlamenti Senatynyń jalpy otyrysynda senator Ikram Adyrbekov osy máseleni kóterdi. Eske salaıyq, otyrysta Qazaqstan men Reseıdiń «Baıqońyr» ǵarysh aılaǵynda apattar bolǵan jaǵdaıdaǵy ózara is-qımyl tártibi týraly kelisimge ózgerister engizý týraly Hattama qabyldanǵan bolatyn.
«Baıqońyrdaǵy» eń aýyr apat 2006 jyly 27 shildede oryn alǵan bolatyn. Men sol kezde Protonnyń ushý alańynda bolǵanmyn. Zymyran kókke kóterilmesten ushyrýdyń alǵashqy sekýndynda-aq jaryldy. Baıqońyr qalasynyń mańyna bir bóligi, negizgi bóligi 100-150 shaqyrym qashyqtyqqa qulady. Bárimiz zymyrannyń qulaý jolyn anyq baıqap qarap turdyq. Alaıda, biz sol Protonnyń qulaǵan ornyn eki kún izdedik. Eki kúnnen keıin oryndy tapqanda onda tek shuńqyr ǵana qalypty. Sóıtsek, bizden buryn Reseı tarapynyń arnaıy qutqarý toby sol sátten iske kirisip, sol túnniń ózinde zymyrannyń qaldyqtaryn alyp ketken. Bul Qazaqstan tarapynan eshqandaı da eskertilmegen», - dedi I. Adyrbekov.
Onyń aıtýynsha, zymyrannyń qulaǵan ornynan alynǵan zerthanalyq synamalar geptıl deńgeıin birneshe esege joǵary kórsetken. Alaıda, eki tarap arasyndaǵy kelisim boıynsha taǵy bir aptadan soń alynǵan synamada geptılden eshqandaı da qaýip anyqtalmaǵan. Bul atalǵan zalaldyń aýa men jerge tez tarap ketetinin kórsetedi.
«Sondyqtan da, geptıldi zalalsyzdandyrý máselesine meılinshe kóńil bólý kerek edi. Bul áli kúnge qaralmaı otyr. Apat bolǵannan keıin birden synamalar alýǵa kirisý kerek. Áıtpese komıssııa qurý, onyń jumys baǵyttaryn kelisýge biraz ýaqyt shyǵyndaımyz. Bizdi geptıl máselesiniń áli durys sheshilmeýi oılandyryp otyr», - dedi senator.
Sonymen qatar, depýtat Qarmaqshy aýdanynda sońǵy on jyl ishinde eki márte apat oryn alǵanyn alǵa tartyp, ondaı apattyń aýdanǵa zalalyna turaqty monıtorıng júrgizý qajettigin atap ótti.
«Taǵy bir ózekti másele - apat bolǵan jaǵdaıda jasalatyn ótemaqy. «Baıqońyrda» oryn alǵan Proton apatynyń sońǵysy 2013 jyly bolyp, Qazaqstan keltirilgen zalaldy 13 mlrd. 690 mln. teńge dep eseptedi. Bul shynynda da solaı, óıtkeni aldyndaǵy 2006 jylǵy apatty 11 mlrd. teńgeden astam dep baǵalaǵan edik. Al sonda Reseıdiń tólegeni bar bolǵany 141 mln. teńge ǵana. Al onyń sebebi bireý joǵaryda aıtylǵanyndaı geptıl deńgeıi shuǵyl tekserilmeı, zalaly da tómendetip kórsetilgen. Sondyqtan da, aldaǵy ýaqytta qol qoıylatyn qujattyń bárinde osy másele eskerilýi tıis», - dedi I. Adyrbekov.