Baıqońyrda bala ólimine jol bergen dáriger sottaldy

BAIQOŃYR. QazAqparat - Baıqońyrda akýsherlik-gınekologııalyq kómek kórsetý barysynda óziniń laýazymdyq jáne kásiptik mindetin tıisti deńgeıde oryndaı almaǵan dáriger eki jylǵa bas bostandyǵynan aıryldy, dep habarlaıdy QazAqparat tilshisi.

«Atalmysh qylmystyq is Baıqońyr qalalyq sotynda qaraldy. Azamatsha T-ǵa qatysty Qylmystyq kodekstiń 317-babynyń 3-bóligimen qylmystyq is qozǵaldy. Ol N. esimdi azamatshaǵa akýsherlik-gınekologııalyq kómek kórsetý barysynda óz mindetterin tıisti deńgeıde oryndaı almaǵan. Sonyń saldarynan bul jaǵdaı sábı ólimine alyp kelgen» delingen Baıqońyr qalalyq sotynyń habarlamasynda. 

Emdeýshi dáriger N. esimdi azamatshanyń júktilik merzimin sol ýaqytta 38-39 apta dep anyqtaǵan. Al Baıqońyr qalasynyń sarapshylarynyń qorytyndysy boıynsha ol 40-41 aptany quraǵan.  Bul oraıda Qyzylorda qalasynyń sarapshylary jasaǵan qorytyndy da soǵan saı keledi.

Baıqońyr qalalyq soty is qujattaryn zertteý barysynda azamatsha T-ny kináli dep tanydy. Oǵan 2 jylǵa bas bostandyǵynan aıyrý jazasy taǵaıyndaldy. Ol jazasyn qylmystyq atqarý júıesiniń qaýipsizdigi barynsha tómen mekemede óteýi tıis. Sondaı-aq, 2 jyl akýsher-genıkolog qyzmetimen aınalysý quqyǵynan aıyryldy.

QR QK 74-babynyń 1-bóligine sáıkes, ol jazasyn 5 jyldan keıin óteıtin boldy.

Sondaı-aq, taıaýda Qyzylorda oblysynda qaıyn ápkesin óltirgen polıtseı sottalǵan bolatyn.