Baıqońyrda arnaıy ekonomıkalyq aımaq qurý usynyldy
«Ekijaqty úkimetaralyq komıssııaǵa Baıqońyrda arnaıy ekonomıkalyq aımaq qurý jóninde usynys berildi. Óıtkeni, Baıqońyrǵa ınvestıtsııa salýǵa nıetti memleketter kóp. Mysaly, BAÁ, Qytaı jáne taǵy basqa elder bar. Bir aıta keterligi, Baıqońyr Qazaqstannyń terrıtorııasynda ornalasqan. Sondyqtan Reseı men AQSh arasyndaǵy sanktsııalarǵa qaramastan óńirge qarjy quıǵysy keletinder barshylyq», - dedi oblys ákimi Ortalyq kommýnıkatsııalar qyzmetinde ótken baspasóz máslıhatynda.
Sonymen qatar, aımaq basshysy bıyl Úkimettiń qala mańyndaǵy Tóretam, Aqaı eldi mekenderin damytý týraly bas jospardy bekitkenin aıtty.
«Baıqońyr Reseıge jalǵa berilgendikten qalanyń ishki ınfraqurylymyna biz jaýap bere almaımyz, al qala mańyndaǵy Tóretam men Aqaıdyń halqy bizdiń qaraýymyzda. Búginde atalǵan eldi mekenderdi damytýdyń bas jospary bekitilip, ol boıynsha jumystar bastalyp ketti. Atap aıtqanda 50 páterden turatyn 5 kópqabatty turǵyn úı aldaǵy jeltoqsan aıynda paıdalanýǵa beriledi» - dedi ol.
Odan bólek, ákim bıyl Tóretamda keshendi saýyqtyrý ortalyǵynyń qoldanysqa berilgenin jáne Máskeýdiń avıatsııalyq ınstıtýmen jyl saıyn 20 qazaqstandyq stýdenttiń bilim alýy týraly kelisim jasalǵanyn aıtyp ótti.
Sondaı-aq, Q.Kósherbaev Reseıdiń «Baıqońyr» ǵarysh aılaǵynan birjola ketýdi josparlap otyrmaǵanyn da jetkizdi.
«Reseılikter Baıqońyrdaǵy barlyq jumysty bitirip, «Vostochnyı» ǵarysh aılaǵyna kóshemiz dep otyrǵan joq. Kerisinshe kóptegen jobalaryn osy ǵarysh aılaǵy arqyly iske asyrýǵa múddeli. Óıtkeni, ǵarysh aılaǵynyń ornalasýy men ondaǵy ushyrý tehnologııasy jaǵynan alǵanda Baıqońyr tıimdi. Jalpy atalǵan aımaqtyń bolashaǵy aldaǵy kúnderi, ıaǵnı 9 qarashada Petropavlda ótetin jıynda qaralyp, jalǵa berý múmkindigin odan ári jalǵastyrý týraly sheshim qabyldanady dep kútilýde», - dep túıindedi sózin óńir basshysy.
Eske salsaq, ústimizdegi jyldyń qyrkúıeginde Máskeýde vıtse-premer Asqar Mamın «Roskosmos» ǵarysh qyzmeti jónindegi memlekettik korporatsııasynyń bas dırektory Dmıtrıı Rogozınmen kezdesken bolatyn. Kezdesý barysynda ekijaqty yntymaqtastyqtyń ózekti máseleleri men «Baıqońyr» keshenin odan ári damytý perspektıvalary týraly pikir almasylyp, «Báıterek» birlesken Qazaqstan-Reseı jobasynyń iske asyrylý barysy talqylandy.