Baıqońyrda analardy ardaqtaýǵa arnalǵan shara bolyp ótti
QYZYLORDA. Shildeniń 29-y. QazAqparat /Rýslan Igilik/ - Baıqońyr qalasyndaǵy balalar men jasóspirimderdiń shyǵarmashylyǵyn damytý ortalyǵynda júzden astam kópbalaly analarǵa Elbasy Jarlyǵymen berilgen «Altyn alqa» jáne «Kúmis alqa» belgileri tabystaldy.
Saltanatty rásimge Qazaqstan Respýblıkasy Prezıdentiniń Baıqońyr keshenindegi arnaýly ókili, oblys ákiminiń orynbasary Sábıt Qojametov pen qala ákimshiliginiń basshysy Aleksandr Mezentsev qatysyp, jınalǵandarǵa quttyqtaý lebizderin jetkizdi.
- Búgingi basqosýymyz táýelsiz elimizdiń ekonomıkasy turaqty damı bastaǵandyǵyna naqty dálel, - dedi Sábıt Nurmahanuly. - Ol analarymyzdyń birneshe perzentti ómirge ákelip, aman-saý ósirýi úshin memleket tarapynan áleýmettik qoldaý men densaýlyq saqtaýdaǵy qamqorlyǵy kúsheıip keledi. Bıik belesterdi baǵyndyrýymyz úshin demografııalyq dúmpýdiń qajettiligi daýsyz.
- Nursultan Ábishulynyń álemge áıgili aılaq pen qalanyń qýatty qurylymdaryn saqtap, halyqaralyq deńgeıde damytýdaǵy qaıratkerlik úlesi orasan zor, - dedi Aleksandr Fedorovıch. - Eki el basshylarynyń jaldyq sıpatta birlese paıdalaný jónindegi ýaǵdalastyǵy ǵaryshnama ǵylymynyń kókjıegin keńeıtýge tyń serpin berip, san salada qyzmet atqaratyn mamandar men tutas turǵyndardyń áleýeti artýyna oń yqpalyn tıgizdi.
Jergilikti atqarý bıliginiń jetekshisi berekesi men birligi jarasqan ortaq úıinde qurmetke bólengen ázız jandardyń dástúrli jolyn jas otbasylardyń jarasymdy jalǵastyratyndyǵyna senim artty. Basshylar budan keıin kópbalaly analardy marapattap, olarǵa gúl shoqtaryn usyndy.
Altynnan alqa taqqan qandastarymyz Qarlyǵash Sádýaqasova, Anarkúl Jubatqanqyzy jáne túri basqa, tilegi bir Nadejda Vıtchenko jaldyq sıpattaǵy óńirdiń tirshiligin jaqsartýǵa súbeli úles qosqan qarapaıym qazaqstandyq retinde ulttar arasyndaǵy tatýlyqty nyǵaıtyp, dástúrli dinderdiń damýyna basymdyq bergen Elbasynyń salıqaly saıasatyn qoldaıtyndyqtaryn jetkizdi.
