Baıqońyrda 2018 jylǵy alǵashqy ushyrylym jasalmaq

BAIQOŃYR. QazAqparat - Baıqońyr ǵarysh aılaǵynda Halyqaralyq ǵarysh stantsııasy (HǴS) baǵdarlamasy aıasynda «Progres MS-08» kóliktik júk kemesin ushyrýǵa daıyndyq júrgizilýde, dep habarlaıdy «QazAqparat» HAA tilshisi. 

2018 jyldyń 7 aqpanynda «Progres MS-08» kóliktik júk kemesi «Soıýz-2.1a» zymyran-tasyǵyshymen birge qurastyrylý úshin bas blok quramymen temir jol arqyly jóneltildi. Roskosmostyń habarlaýynsha, jalpy qurastyrylym boıynsha tehnologııalyq operatsııalar kesheni 8 aqpan kúni zymyran-tasyǵyshtyń montajdy-zertteý korpýsynda júrgiziledi.

«Progres MS-08» KJK Halyqaralyq ǵarysh stantsııasyna ekıpajdyń ómir súrýi men stantsııanyń jumys istep turýy úshin 2,5 tonnaǵa jýyq júkti jetkizedi. Onyń 1390 kelisi qurǵaq júk, 890 keli jaǵarmaı, 420 kg sý, sonymen birge 46 keli ballonǵa syǵylǵan aýa men ottegi.

Ǵaryshqa osy sapardyń júrgizilýimen Baıqońyr ǵarysh aılaǵynda Roskosmostyń 2018 jylǵy baǵdarlamasy bastalady.