Baıqońyrda 1 sáýirden bastap zeınetaqyny kezekti ındeksteý júrgizildi
Buǵan qosa, áleýmettik zeınetaqy kólemi ulǵaıdy, dep habarlady Baıqońyr qalasy boıynsha RZQ bólimshesiniń basqarýshysy Vıacheslav Zablotskıı.
«4500-ge jýyq baıqońyrlyq zeınetkerlerdiń eńbek zeınetaqysy 3,3 paıyzǵa ósti, 1400-den astam zeınetkerdiń áleýmettik zeınetaqylary - 1,81 paıyzǵa ósti. Azamattardyń jeke sanattaryna (ardagerler, múgedekter, radıatsııa áserine jáne t.b. shaldyqqan azamattar) tólenetin aı saıynǵy aqsha tólemderi (Qazaqstandaǵy arnaıy memlekettik járdemaqynyń balamasy) 1 sáýirden bastap 5,5 paıyzǵa ındekstelgen, bul ulǵaıý 454 adamǵa qatysty boldy», - dedi ol.
Zeınetaqy bólimshesi basshysynyń aıtýynsha, sáýirdegi kezekti ındeksteýdiń nátıjesinde qarttyq boıynsha eńbek zeınetaqysynyń ortasha kólemi Baıqońyrda búgingi kúni 10 myń rýbldi qurap otyr, bul 50 myń teńgeni quraıdy. Salystyrý úshin: Qazaqstanda zeınetaqynyń ortasha kólemi aǵymdaǵy jyly boljam boıynsha bazalyq zeınetaqy tólemin eseptegende 42 myń teńgeden sál ǵana joǵary bolady.
Baıqońyr qalasy boıynsha RZQ bólimshesi jumysynyń ereksheligi - 1996 jylǵy 27 sáýirdegi RF Úkimeti men QR Úkimetiniń arasyndaǵy Baıqońyr qalasy turǵyndarynyń zeınetaqy quqyqtarynyń kepilderi týraly kelisimge sáıkes, bólimshe Reseı jáne Qazaqstan azamattaryna, sonymen qatar, qala aýmaǵynda turaqty turatyn azamattyǵy joq tulǵalarǵa zeınetaqylyq qyzmet kórsetýmen aınalysatyndyǵy bolyp tabylady.
«Halyqaralyq quqyqtyń jalpyǵa ortaq qaǵıdalaryna sáıkes, atalmysh ekijaqty úkimetaralyq kelisimniń áreketine baılanysty, Baıqońyr aýmaǵyndaǵy qazaqstandyq zeınetaqy zańnamasynyń normalary belgili bir sanattaǵy tulǵalar úshin qoldanylmaıdy. Baıqońyr qalasynda turaqty turyp jatqan Qazaqstan azamattaryna zeınetaqy Reseı zańnamasy boıynsha taǵaıyndalady. Zeınetaqy jasy áıelder úshin - 55 jas, erler úshin - 60 jas bolyp ornatylǵan», - dedi V. Zablotskıı.