Baıqońyr turǵyny balasynyń ózinen emestigin aıtyp, sotqa júgindi
BAIQOŃYR. QazAqparat - Baıqońyr qalalyq sotynda azamat S-nyń kámeletke tolmaǵan balasyna ákelikten bas tartý týraly azamattyq is qaraldy. Bul jóninde Baıqońyr qalalyq sotynyń baspasóz qyzmeti málim etti, dep habarlaıdy QazAqparat tilshisi.
Talap qoıýshy óziniń burynǵy áıelimen ortaq nekeden 4 balasy bar ekenin jetkizgen. Olardyń arasynda 2003 jyly dúnıege kelgen kishi balasy ózinen emes dep joramaldaǵanyn jasyrmaǵan. Soǵan oraı sottan saraptama taǵaıyndaýdy suraǵan. Ol kórshilerinen kishi balasy ózinen emestigi jaıynda estigen. Óıtkeni, sol jyldarda ol otbasynan ketip qalyp júrgenin aıtady.
Al 2006 jyldan beri erli-zaıyptylar birge turmaıdy eken. Atalǵan neke 2009 jyly sot arqyly buzylǵan. Burynǵy áıeli saraptama jasaýǵa qarsy emestigin aıtqan. Ony burynǵy kúıeýiniń alıment tóleýden jaltarǵany dep túsinetinin aıtqan.
«Sot taraptardy tyńdap, sot molekýlıarly-genetıkalyq saraptama taǵaıyndady. Onyń qorytyndysy boıynsha talap qoıýshy S-nyń kámelet jasqa tolmaǵan balanyń ákesi ekeni anyqtaldy», - dedi Baıqońyr qalalyq sotynyń baspasóz mamany Malıka Altyrýova.
Osyǵan baılanysty talap qoıýshynyń kámelettik jasqa tolmaǵan balasyna ákeliginen bas tartý týraly talap aryzy qanaǵattandyrýsyz qaldyrdy.
