Baıqońyr turǵyndaryna tabıǵı gaz berildi
Oǵan Qyzylorda oblysynyń ákimi Qyrymbek Kósherbaev, «QazTransGaz Aımaq» AQ Bas dırektory Manas Tasybaev jáne Baıqońyr qalasy ákimshiliginiń basshysy Konstantın Býsygın qatysty. 
Osyǵan deıin suıytylǵan gaz paıdalanyp kelgen Baıqońyr qalasynyń turǵyndary úshin bul - aıtýly oqıǵa. Tabıǵı kógildir otynǵa kóshýdiń artyqshylyqtary aıqyn - tabıǵı gazdy turmysta paıdalaný áldeqaıda qolaıly ári qaýipsiz, ózge otyn túrlerimen salystyrǵanda baǵasy da aıtarlyqtaı arzan. Qalaǵa tabıǵı gaz berilýi - shaǵyn jáne orta bıznesti damytyp, jańa jumys oryndaryn ashýǵa, ıaǵnı áleýmettik-ekonomıkalyq ósimge jol ashylady.
Alǵashqy 6 turǵyn úıden ózge, 6 mektep pen 1 balabaqsha kógildir otyn qubyryna jalǵandy. Gaz avtonomdy qazandyqtarǵa da berilýde. 
Baıqońyr qalasyn Qazaqstannyń tabıǵı gazyna qosý úshin ulttyq operator «QazTransGaz» AQ óz qarajaty esebinen qajetti ınfraqurylymdy tolyǵymen saldy. «Beıneý-Bozoı-Shymkent» magıstraldyq gaz qubyrynan «Baıqońyr» avtomattandyrylǵan gaz taratý stantsııasyna (AGTS) deıin uzyndyǵy 4 shaqyrymdyq burma gaz qubyry salyndy. Al AGTS-ten qalaǵa deıin uzyndyǵy 10 shaqyrym jetkizýshi gaz qubyry tóseldi. Qala ishindegi qubyrlardyń uzyndyǵy 33,5 shaqyrymnan asady. Qalada 20,6 myń abonentti gaz qubyryna qosý josparlanyp otyr, bul - 300 asa kóppáterli úı.
Bıyl maýsym aıynda ótken «Baıqońyr» kesheni jónindegi Reseı-Qazaqstan úkimetaralyq komıssııasynyń 5-shi otyrysynda, «QazTransGaz» AQ, Qyzylorda oblysynyń ákimdigi, Baıqońyr qalasynyń ákimshiligi, «TsENKI» FUBB arasyndaǵy yntymaqtastyq arqasynda qalany gazdandyrý syzbasy bekitildi.
19 qazanda Astanada Baıqońyr tarıhynda tuńǵysh ret «Gaz sharýashylyǵy» qalalyq birtutas mekemesi, «QazTransGaz» AQ jáne «QazTransGaz Aımaq» AQ arasynda kelisimge qol qoıyldy. Kelisim negizinde qaladaǵy nysandar tabıǵı gaz tutyna bastady.
Baıqońyr qalasyn gazdandyrýǵa arnalǵan jumystar 2014 jyly bastaý aldy. Sol jyly qarasha aıynda «Beıneý-Bozoı-Shymkent» magıstraldyq gaz qubyrynan «Baıqońyr» avtomattandyrylǵan gaz taratý stantsııasyna deıingi burma gaz qubyrynyń qurylysy bastaldy.
Bul nysan ulttyq operator «QazTransGaz» júzege asyrǵan «Qyzylorda oblysynyń 5 eldi mekenin gazdandyrý» aýqymdy ınvestıtsııalyq jobasynyń aıasynda turǵyzyldy.
Aıta ketken jón, «Qyzylorda oblysynyń 5 eldi mekenin gazdandyrý» ınvestıtsııalyq jobasy 2013 jyly Qyzylorda oblysy ákimdigi men «QazTransGaz Aımaq» AQ arasynda qol qoıylǵan memorandým sheńberinde júzege asyryldy. Joba aıasynda Baıqońyr men Aral qalalary jáne Shıeli, Jańaqorǵan, Áıteke bı kentterinde 5 AGTS pen kóshearalyq gaz qubyrlary salyndy. Osynyń arqasynda óńirdiń 200 myńǵa tarta turǵyny tabıǵı gazdy tutyný múmkindigine ıe boldy. Baıqońyr qalasy jylyna orta eseppen 1650 tonna suıytylǵan gaz paıdalanady.