Baıqońyr turǵyndaryna memqyzmetterdi kórsetý jeńildedi

NUR-SULTAN. QazAqparat - Parlament Senatynyń jalpy otyrysynda «1995 jylǵy 23 jeltoqsandaǵy Qazaqstan men Reseı arasyndaǵy Baıqońyr qalasynyń mártebesi jáne ondaǵy atqarýshy ókimet organdaryn qurýdyń tártibi men olardyń mártebesi týraly kelisimge ózgeris engizý týraly hattamany ratıfıkatsııalaý týraly» Zańy qabyldandy, dep habarlaıdy QazAqparat tilshisi.

Hattamaǵa 2016 jylǵy jeltoqsanda Sankt-Peterbor qalasynda qol qoıyldy.

«Hattama Qazaqstannyń Baıqońyr qalasynda jumys isteıtin memlekettik organdar tizbesine qosymsha elimizdiń 10 memlekettik organy bólimshelerin qosýdy kózdeıdi. Olardyń arasynda qorshaǵan ortany qorǵaý, jerdi qorǵaý jáne paıdalaný, jumyspen qamtý jáne áleýmettik baǵdarlamalar, ádilet, memlekettik kirister, statıstıka, qazynashylyq, ulttyq qaýipsizdik, sondaı-aq shekara qyzmeti jáne sot ákimshiligi salasyndaǵy ókiletti organdardyń bólimsheleri eskerilgen», - dedi QR Tsıfrlyq damý, qorǵanys jáne aeroǵarysh ónerkásibi mınıstriniń mindetin atqarýshy Marat Nurǵojın.

Aıta keteıik, buryn bul kelisimde Baıqońyr qalasynda tek 8 memlekettik organ bekitilgen, ıaǵnı sot, prokýratýra, aeroǵarysh komıtetiniń bólimshesi, Baıqońyr keshenindegi QR Prezıdentiniń arnaýly ókili jáne basqa da organdar qamtylǵan edi. Osylaısha, Baıqońyr qalasynda Qazaqstan Respýblıkasynyń 18 memlekettik organy jumys isteıtin bolady.

«Hattamamen bolashaqta memlekettik organdardyń jańa bólimshelerin ashý rásimin jeńildetý qarastyrylǵan. Joǵaryda atalǵan memlekettik organdardyń bólimshelerin ashý Baıqońyr qalasynyń turǵyndaryna barlyq qajetti qyzmetter men aqparatty jedel alýǵa múmkindikti beredi. Reseı tarapynan bul hattamanyń kúshine enýine baılanysty memleket ishindegi rásimder oryndaldy», - dedi M. Nurǵojın.