Baıqońyr turǵyndary tabıǵı gaz tutynatyn boldy

BAIQOŃYR. QazAqparat - Qyzylorda oblysyna jumys sapary barysynda Qazaqstan Respýblıkasynyń Energetıka mınıstri Nurlan Noǵaev pen óńir basshysy Gúlshara Ábdiqalyqova Baıqońyr qalasyna bardy.

Bul týraly QazAqparat QR Energetıka mınıstrliginiń baspasóz qyzmetine silteme jasap habarlaıdy.

Baspasóz qyzmeti taratqan málimetterge qaraǵanda, 2019 jylǵy 3 sáýirde Máskeýde Qazaqstan Respýblıkasynyń Prezıdenti Qasym-Jomart Toqaevtyń Reseı Federatsııasyna resmı sapary kezinde Qazaqstan Respýblıkasynyń Úkimeti men Reseı Federatsııasynyń Úkimeti arasynda «Baıqońyr» keshenin gazben jabdyqtaý týraly kelisimge (budan ári - Kelisim) qol qoıyldy. Qujat Qazaqstan Respýblıkasynyń 2020 jylǵy 26 naýryzdaǵy № 305-VI ZRK Zańymen ratıfıkatsııalandy.

Kelisim tutynýshylardy suıytylǵan gazdan tabıǵı gazǵa kóshirýdi kózdeıdi jáne onyń mynadaı artyqshylyqtary bar:

- Baıqońyr qalasynyń tutynýshylary, onyń shamamen 60% Qazaqstan azamattary, qoljetimdi jáne ekologııalyq taza otynmen - tabıǵı gazben turaqty qamtamasyz etiledi. Bul suıytylǵan munaı gazyna qaraǵanda áldeqaıda arzan.

2020 jyldan bastap Qazaly qalasy men Shıeli aýdany Bekejanov kentin gazdandyrý jobalaryn júzege asyrý bastalǵanyn, bul óz kezeginde aımaq turǵyndarynyń áleýmettik jaǵdaılaryn jaqsartýǵa yqpal etetinin atap ótken jón.

Nurlan Noǵaev jáne Gúlshara Ábdiqalyqova Baıqońyr qalasyndaǵy «Baıqońyrenergo» óndiristik-energetıkalyq qaýymdastyǵy kásipornynyń» jumysymen tanysty.

Sapar qorytyndysy boıynsha mınıstr jaýapty tulǵalarǵa birqatar naqty tapsyrma berdi.