Baıqońyr turǵyndary Qazaqstannyń densaýlyq saqtaý júıesimen qamtylady
Atap aıtqanda, jalpy otyrysta palata depýtattary «2009 jylǵy qarashadaǵy QR Úkimeti men RF Úkimeti arasynda «Baıqońyr» keshenin jalǵa alý jaǵdaıynda ǵarysh aılaǵynyń personalyna, Baıqońyr qalasynyń, Tóretam jáne Aqaı kentteriniń turǵyndaryna medıtsınalyq qyzmet kórsetý tártibi týraly kelisimge ózerister engizý týraly hattamany ratıfıkatsııalaý týraly» zań jobasyn maquldady.
«Kelisiminiń aıasynda osy Baıqońyr qalasynda turatyn, ıaǵnı 48 myńnan astam Qazaqstan azamattaryna kórsetiletin medıtsınalyq kómek tek reseılik medıtsınalyq uıymdarmen RF zańnamasyna sáıkes beriledi. Qazaqstanda júzege asyrylatyn medıtsınalyq kómektiń erekshelikterin eskere otyryp, el azamattary zańnamamyzǵa sáıkes tegin medıtsınalyq kómekti, dárilik zattar men medıtsınalyq maqsattaǵy buıymdardy tegin alý, profılaktıkalyq medıtsınalyq tekserýden ótý zańdy quqyǵymen qamtamasyz etilmegen. Sonymen qatar Baıqońyr turǵyndarynda qoljetimdi joǵary mamandandyrylǵan medıtsınalyq kómekti alý múmkindigi joq. Bul múgedek adamdardyń ómiriniń jáne jalpy ómir súrý sapasynyń tómendeýi qaýpin ulǵaıtady. Qoldanystaǵy kelisimge ózgerister engizý týraly hattama jobasy Baıqońyr qalasynyń, Tóretam jáne Aqaı kentterinde turatyn QR azamattaryna ulttyq zańnamaǵa sáıkes, Qazaqstan densaýlyq saqtaý mekemelerimen medıtsınalyq qyzmet kórsetýge múmkindik beredi», - dep naqtylady mınıstr.
E. Birtanov 2016 jyldyń 12 tamyzynda Baıqońyr qalasynda oblystyq medıtsınalyq ortalyǵynyń fılıaly paıdalanýǵa berilgenin eske salyp ótti. Sonymen qatar 2018 jylǵy qańtardan bastap qalada 30 myń adamǵa qyzmet kórsetetin emhana ashyldy. Qazirgi ýaqytta bul emhanaǵa 17 myńnan astam turǵyn tirkelgen. 2019 jyly operatsııalyq bólimdi jáne jansaqtaý bólimshesin uıymdastyrý men hırýrgııany ashý josparlanyp otyr.
«Alaıda Baıqońyr qalasynyń aýmaǵyndaǵy qazaqstandyq medıtsınalyq uıymdardyń qyzmet kórsetý quqyǵyn bekitý - tek zańnamaǵa ózgerister engizý týraly hattama kúshine engennen keıin múmkin bolady. Zań jobasy teris áleýmettik-ekonomıkalyq, quqyqtyq saldarǵa alyp kelmeıdi», - dedi mınıstr.