Baıqońyr, Tóretam, Aqaı zeınetkerlerine MÁMS arqyly jeńildetilgen kómek berilýi múmkin

ASTANA. QazAqparat – Qyzylorda oblysynyń Baıqońyr qalasy, Tóretam jáne Aqaı kentterindegi zeınetaqyny Reseı Federatsııasynan alatyn qazaqstandyqtarǵa MÁMS aıasynda jeńildetilgen kómek berilýi múmkin, dep habarlaıdy QazAqparat tilshisi.

Bul týraly Premer-Mınıstr Álıhan Smaıylov Senat depýtattarynyń saýalyna joldaǵan jaýabynda málim etti.

«Qazirgi tańda Qyzylorda oblysynyń Baıqońyr qalasynda, Tóretam jáne Aqaı kentterinde turatyn, onyń ishinde Reseı Federatsııasynyń zeınetaqy júıesinen zeınetaqy tólemderin alýshylar bolyp tabylatyn Qazaqstan Respýblıkasynyń azamattaryna jeńildikti medıtsınalyq kómek kórsetý úshin «Mindetti áleýmettik medıtsınalyq saqtandyrý týraly» Zańyna tıisti túzetýlerdi engizý boıynsha jumystar júrgizilip jatyr. Memlekettik organdardyń aqparattyq júıelerin jetildirý zańǵa táýeldi quqyqtyq aktiler sheńberinde qarastyrylady. Jalpy, atalǵan baǵyttaǵy jumys jalǵasady jáne ýákiletti memlekettik organdardyń turaqty baqylaýynda bolady», - dep jazylǵan jaýapta.

Eske salsaq, senator Aqmaral Álnazarova Premer-Mınıstr Álıhan Smaıylovtyń atyna joldaǵan depýttatyq saýalynda Baıqońyr qalasyndaǵy myńdaǵan qazaqstandyqtyń sapaly medıtsınalyq qyzmet ala almaı júrgeni týraly aıtqan edi.