«Baıqońyr» sııaqty ǵarysh kesheni bar el úshin óz azamattaryn ǵaryshqa ushyra almaý - úlken syn
ASTANA. 10 qarasha. QazAqparat - Búgin Májilistiń jalpy otyrysynda depýtat Nurtaı Sabılıanov qazaq ǵaryshkerleriniń máselesin kóterip, QR Premer-Mınıstri Kárim Másimov myrzanyń atyna depýtattyq saýal joldady.
Depýtat qasıetti qazaq jerinen adamzat balasy tuńǵysh ret ǵaryshqa ushqany, bizdiń elimizde dúnıejúzindegi iri ǵarysh kesheni bolyp tabylatyn «Baıqońyr» kosmodromy ornalasqany barshaǵa málim ekenin aıtyp ótti.
Alǵashqy qazaq ǵaryshkeri Toqtar Áýbákirovtiń 1991 jylǵy 2 qazanda jáne odan keıin Talǵat Musabaevtyń 1994 jylǵy 1 shildedegi ǵaryshqa saparynan keıin qazaq azamaty ǵaryshqa ushqan joq. 2003 jyldan bastap eki azamatymyz - Muhtar Aımahanov pen Aıdyn Aıymbetov ǵaryshkerlikke kandıdat retinde Reseıdegi ǵaryshkerler daıyndaıtyn ortalyqta arnaıy daıyndyqtan ótken. Biraq atalǵan eki azamatymyzdyń ǵaryshqa ushý máselesi qarjy máselesine baılanysty búgingi kúnge deıin sheshilmegen eken. Namysy bar, bilimi bar, patrıottyq sezimi bar osy eki qazaq azamatyn ǵaryshqa ushyrsa elimiz úshin úlken abyroı bolar edi.
«Ǵarysh keńistigin ıgerý qyzmeti asa qymbat joba ekeni belgili. Degenmen de onyń memleketimizdiń múddesi úshin qajet ekenine eshkim kúmán keltirmeıdi. Onyń ústine «Baıqońyr» sııaqty ǵarysh kesheni bar el úshin óz azamattaryn ǵaryshqa ushyra almaý - úlken syn. Sondyqtan Sizden memleketimizdiń táýelsizdiginiń 20 jyldyǵy qarsańynda 2003 jyldan bastap arnaıy daıyndyqtan ótken azamattarymyz M.Aımahanov pen A.Aıymbetovty ǵaryshqa ushyrýǵa Úkimet tarapynan qoldaý kórsetý máselesin qarastyrýdy suraımyn»,- dedi depýtat Nurtaı Sabılıanov.
