Baıqońyr mańynda oıyn-saýyq týrıstik aımaǵy qurylýda

ASTANA. QazAqparat - Búgin selektorlyq rejimdegi Úkimet otyrysynda Qyzylorda oblysynyń ákimi Qyrymbek Kósherbaev «Baıqońyrda» týrıstik aımaqty damytý jaıynda baıandady, dep habarlaıdy QazAqparat.

«Biz AQSh-taǵy ǵaryshtyq týrızmdi zerttep shyqtyq, ıaǵnı atalǵan eldegi ǵarysh aılaǵyna 3 mıllıonǵa jýyq týrıst barady. Sondyqtan Roskosmospen birlese «Baıqońyr» týrıstik aımaǵyn qurý tujyrymdamasy ázirlendi. Jalpy, tujyrymdama úkimetaralyq komıssııada maquldandy. Osy oraıda tıisti usynysty 2023 jylǵa deıingi Tujyrymdamanyń jobasyna engizdik»,-dedi Kósherbaev.

Sondaı-aq ol bul baǵyt klaster emes, oıyn-saýyq týrıstik aımaǵy ekenin naqtylady.

«Biz onda «Qorqyt Ata» keshenin, «Qambash» kólin jáne mádenı muranyń basqa da nysandaryn engizip otyrmyz. Búginde 10-ǵa jýyq kompanııa osy týrıstik tujyrymdamamen jumys istep jatyr»,-dedi oblys ákimi.