«Baıqońyr» qysqametrajdy fılmder kınofestıvaliniń jeńimpazdary anyqtaldy
ALMATY. QazAqparat - Almatyda ІІ Respýblıkalyq «Baıqońyr» qysqametrajdy fılmder kınofestıvali óz máresine jetti, dep habarlaıdy QazAqparat tilshisi.
Eki kúnge sozylǵan «Baıqońyr» qysqametrajdy fılmder festıvaliniń qorytyndysy boıynsha bas júldeni Sh.Aımanov atyndaǵy «Qazaqfılm» kınostýdııasy túsirgen «Páter» jáne «Jestkıı tıp» fılmderi jeńip aldy. «Páter» fılminiń rejısseri Erbol Boranshy «Úzdik rejısser» atandy. Al festıvaldiń Bas júldesin «Jestkıı tıp» fılmimen Baımurat Jumanov enshiledi.
Úzdik operator - Turan Mural («Malybaıdaǵy oqıǵa»), úzdik qoıýshy -sýretshi - Beken Narbaı («Kýb»), úzdik stsenarıı - «6 páterdiń» avtory Oljas Ahmetov, úzdik eksperımentaldy fılm - Sábıt Ábdiniń «Ǵaısha» fılmi, úzdik derekti fılm - Jaıyq Belqojaevtyń «Men oraldym» fılmi, úzdik anımatsııalyq fılm - Toǵjan Baısabaevanyń «Sıqyrly baqshasy»; úzdik aktrısa - Perızat Madenova, úzdik akter retinde Erbolat Erjanov tanylsa, qazylar alqasynyń arnaıy júldesi Samǵar Raqymnyń «Malybaıdaǵy oqıǵa» fılmine buıyrdy.
«Baıqońyr» kınofestıvali osymen ekinshi ret ótkizilip otyr. Festıvaldiń basty maqsaty jas kınematografısterge fılmderin kórermen aldyna shyǵarýǵa múmkindik jasaý jáne otandyq qysqametrajdy fılmderdi nasıhattaý. Festıvaldiń úzdikterin anyqtaýǵa qatysqan qazylar alqasy músheleri ishinde QR Kınematografıster odaǵynyń tóraǵasy Ahat Ibraev, «Qazaqfılm» kınostýdııasy janyndaǵy «Debıýt» ShÓB basshysy Anar Qashaǵanova, rejısser Janabek Jetirýov, qoıýshy-sýretshi Ómirzaq Shmanov jáne basqalar bar.
Aıta ketelik, rejısser Erbol Boranshynyń «Páter» fılmi Kambodjadaǵy 6-shy Halyqaralyq Chaktomuk qysqametrajdy fılmder festıvaliniń irikteýinen ótip, negizgi baǵdarlamasynda baq synaıdy. Festıval Pnompen qalasynda qazannyń 25-i men 30-y aralyǵynda ótedi.
