«Baıqońyr» kesheni boıynsha ÚAK otyrysynda qalanyń jańa basshysyn tanystyrady

ASTANA. QazAqparat -  Ótken aptada keıinge qaldyrylǵan «Baıqońyr» kesheni boıynsha úkimetaralyq komıssııa otyrysy Baıqońyr qalasynda 2017 jylǵy 12-13 maýsymda ótedi, dep habarlady «QazAqparat» HAA tilshisi.

Taraptardyń teń tóraǵasy - QR Premer-Mınıstriniń birinshi orynbasary Asqar Mamın men RF Úkimeti tóraǵasynyń orynbasary Dmıtrıı Rogozın júrgizetin qazaqstandyq-reseılik ÚAK 5-shi otyrysynyń kún tártibine «Baıqońyr» ǵarysh kesheniniń jumys isteýi boıynsha 10-ǵa jýyq másele engizildi.

Úkimetaralyq komıssııada Baıqońyr qalasy ákimshiliginiń jańa basshysy Konstantın Býsygın tanystyrylady dep kútilýde. Onyń taǵaıyndalatyny jaıly budan buryn keı BAQ-tar habardar etken bolatyn.

Ǵarysh aılaǵyna kóp jyl qyzmet etken,  RF jergilikti atqarýshy organy qurylǵan kúnnen bastap reseı ákimshiliginde jumys isteıtin Baıqońyr qalasynyń qazirgi basshysy Anatolıı Petrenko ázirge ÚAK reseılik bóligi quramynda.