Baıqońyr qalasynyń mártebesi týraly kelisimge ózgerister engizý jaıy qarastyryldy

ASTANA. QazAqparat - Senattyń Qarjy jáne bıýdjet komıtetiniń keńeıtilgen otyrysynda «1995 jylǵy 23 jeltoqsandaǵy Qazaqstan Respýblıkasy men Reseı Federatsııasy arasyndaǵy Baıqońyr qalasynyń mártebesi jáne ondaǵy atqarýshy ókimet organdaryn qurýdyń tártibi men olardyń mártebesi týraly kelisimge ózgerister engizý týraly hattamany ratıfıkatsııalaý týraly» zań jobasy qaraldy.

2016 jylǵy 12 sáýirde Máskeýde qol qoıylǵan Hattamanyń maqsaty qosarlanǵan salyq salý máselelerin, atap aıtqanda, Baıqońyr qalasynyń aýmaǵynda nemese Qazaqstannyń ózge aýmaǵynda taýarlardy ótkizý jáne ákelý kezinde, sondaı-aq jumystardy oryndaý men qyzmetter kórsetý kezinde janama salyqtardy qoldaný máselelerin retteý bolyp tabylady.

Senattyń Qarjy jáne bıýdjet komıtetiniń tóraǵasy Rashıt Ahmetov jýrnalısterge: «Hattamaǵa sáıkes Baıqońyr qalasynyń aýmaǵynan Qazaqstannyń ózge aýmaǵyna taýarlar áketiletin nemese Qazaqstannyń ózge aýmaǵynan Baıqońyr qalasynyń aýmaǵyna taýarlar áketiletin jaǵdaıda nóldik stavka boıynsha qosylǵan qun salyǵy salynady jáne aktsızdeletin taýarlarǵa qatysty aktsızder tóleýden bosatylady», - dedi.

Budan basqa, jumys isteý, qyzmet kórsetý kezinde janama salyqtardy óndirip alý, eger bul aýmaq jumystardy, kórsetiletin qyzmetterdi ótkizý orny bolyp tanylatyn jaǵdaıda Baıqońyr qalasynyń aýmaǵynda nemese Qazaqstannyń ózge aýmaǵynda júzege asyrylady.

R.Ahmetov sondaı-aq qujattyń qabyldanýy taýar aınalymyn arttyrýǵa jáne aımaqtardaǵy kásipkerlik múmkindikterin ulǵaıtýǵa yqpal etetinin atap ótti.

Zań jobasy Palatanyń qaraýyna jiberildi.