Baıqońyr qalasynda shekaralyq qyzmet ashylmasa, ol jerge Reseı ushaqtaryn qondyrmaýǵa quqylymyz - M. Moldabekov
ASTANA. 28 jeltoqsan. QazAqparat /Qanat Mámetqazyuly/ - Baıqońyr qalasynda shekaralyq qyzmet ashylmasa, ol jerge Reseı ushaqtaryn qondyrmaýǵa quqylymyz.
Búgin QR Parlamenti Senatynyń jalpy otyrysynda «Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy Ǵarysh keńistigin beıbit maqsattarda zertteý jáne paıdalaný salasyndaǵy yntymaqtastyq týraly kelisimdi ratıfıkatsııalaý týraly» zań jobasyn talqylaý barysynda QR Ulttyq ǵarysh agenttigi tóraǵasynyń orynbasary Meıirbek Moldabekov osylaı málim etti.
«Baıqońyr aımaǵyna qatysty shekaralyq baqylaý máselesinde birqatar máseleler týyndap otyr. Árıne, ondaǵy shekara, shekaralyq baqylaý máselesiniń qaralyp jatqanyna 3-4 jyl bop qaldy. Tipti keı jaǵdaıda shekaralyq baqylaýsyz kelýge qatysty Qazaqstan eliniń zańyn buzýshylyqtar kórinis alyp jatady. Sondyqtan da, sońǵy ýaqytta úkimetaralyq komıssııaǵa dál osy máseleni bir-eki márte qoıǵan bolatynbyz. Ol sheshimin tappady. Endigi kúni biz de óz tarapymyzdan tásilge salamyz. Máselen, Baıqońyr qalasynda shekaralyq qyzmet ashylmasa, ol jerge Reseı ushaqtaryn qondyrmaýǵa quqymyz bar», - dedi depýtattar saýalyna jaýap bergen M. Moldabekov.
Onyń aıtýynsha, bundaı quqyqty qoldaný óz nátıjesin berip qalýy da múmkin.
