Baıqońyr qalasynda medıtsınalyq ortalyq ashyldy (FOTO)
Esterińizge sala keteıik, 2007 jyly Qazaqstan men Reseı arasyndaǵy kelisim negizinde Baıqońyr qalasynda 80 tósektik perzenthana, Qazaqstan Respýblıkasynyń qarajaty esebinen aýysymyna 100 kelýshige arnalǵan áıelderge keńes berý ortalyǵyn salý týraly sheshim qabyldanǵan bolatyn.
Ortalyq ǵımaratynyń qurylysyna 1 mlrd teńgeden astam qarajat jumsalǵan. Qurylys jumystary 2010 jyldyń aıaǵynda aıaqtalyp, ártúrli sebeptermen nysannyń ashylýy keıinge qaldyrylyp keldi. Tek 2015 jyldyń qarashasynda Qyzylorda oblysy ákimdiginiń bastamasymen Máskeýde ótken úkimetaralyq komıssııa otyrysynda atalmysh ǵımaratty Qazaqstan tarapyna berý týraly sheshim qabyldanyp, aýrýhanany jabdyqtaý úshin qosymsha qarajat bólindi.
Oblystyq medıtsınalyq ortalyq fılıalynyń ashylý saltanatyna oblys ákimi Qyrymbek Kósherbaev, «Jer ústi ǵarysh ınfraqurylymyn paıdalaný» ortalyǵy bas dırektorynyń mindetin atqarýshy Ranohon Djýraeva qatysyp, Baıqońyr qalasy turǵyndarynyń qýanyshyna ortaqtasty.
«Oblystyq medıtsınalyq ortalyq fılıalynyń ashylýy - Baıqońyr qalasynda turatyn qazaqstandyqtar úshin úlken qýanysh. Táýelsizdiktiń 25 jylynda oblysta 3 medıtsınalyq ortalyq paıdalanýǵa berildi. Olar: oblystyq medıtsınalyq, dıagnostıkalyq jáne perınataldyq ortalyqtar. Sonymen qatar, 5 aýdandyq emhana, bir aýrýhana, 4 týberkýlezge qarsy dıspanser, Qyzylorda qalasynan zamanaýı emhana jáne óńirdiń barlyq eldimekenderinen jalpy sany 100-ge jýyq emdeý mekemesi el ıgiligine paıdalanýǵa berildi. Olardyń barlyǵy avtokólikpen, qajetti medıtsınalyq qural-jabdyqtarmen qamtamasyz etilgen. Sonymen birge, joǵary mamandandyrylǵan kardıologııalyq jáne neıroınsýlttik ortalyqtar ashyldy. Nátıjesinde respýblıkanyń basqa qalalaryna baryp emdeletin qyzylordalyqtar sany 3 esege azaıdy», - dedi oblys ákimi.
Aıta keteıik, Baıqońyr qalasynda jańadan ashylǵan medıtsınalyq ortalyq 240 myń halqy bar Qarmaqshy, Qazaly men Aral aýdandarynyń turǵyndary úshin de medıtsınalyq kómek kórsetetin bolady.
Medıtsınalyq kómek soltústik aýdandardyń turǵyndary oblys ortalyǵyna baryp em alatyn basty baǵyttar boıynsha júrgiziledi. Qazirdiń ózinde Baıqońyrdaǵy oblystyq medıtsınalyq ortalyq fılıalynda ońaltý jáne terapııa bólimsheleri jumys istep tur. Kezeń-kezeńimen oftalmologııa, lor, hırýrgııalyq, gınekologııalyq bólimshe men perzenthana jumysyn bastaıdy.
