Baıqońyr ǵarysh kesheninde paıdalanylmaıtyn nysandardyń taǵdyry belgili boldy

ASTANA. QazAqparat - Parlament Májilisiniń jalpy otyrysynda QR Tsıfrlyq damý, qorǵanys jáne aeroǵarysh ónerkásibi mınıstri Asqar Jumaǵalıev Baıqońyr ǵarysh kesheninde Reseı jaǵy paıdalanbaıtyn nysandar Qyzylorda oblysynyń ákimdigine ótkiziletinin aıtty, dep habarlaıdy QazAqparat tilshisi.

Otyrys barysynda depýtat Beıbit Mamraev qazirgi kezde obektıvti sebeptermen Baıqońyr ǵarysh kesheniniń birqatar bóligin Reseı tarapy paıdalanbaı otyrǵanyn eske saldy.

«Aldaǵy ýaqytta ǵarysh kesheni nysandarynyń saqtalýy men paıdalanýyn qalaı josparlap otyrsyzdar?», - dep surady B. Mamraev.

Óz kezeginde Asqar Jumaǵalıev Reseı jaǵy ǵarysh baǵdarlamasy boıynsha ońtaılandyrý jumystaryn atqaryp jatqanyn atap ótti.

«Sondyqtan RF tarapymen keliskenimizdeı, qazirgi kezde paıdalanylmaıtyn nysandardy biz ózimizge múlikke alyp otyrmyz. Bolashaqta osy nysandarmen eki baǵyt boıynsha jumys isteımiz. Birinshiden, ǵarysh baǵdarlamasyna sáıkes kelmeıtin nysandardy ózimiz paıdalanyp, Qyzylorda oblysy ákimdigine beremiz. Olar ınvestorlardy, jeke kásiporyndardy tartý sharalaryn pysyqtaıtyn bolady. Al ǵarysh baǵdarlamasyna sáıkes keletin nysandarmen ózimiz (mınıstrlik) jumys isteımiz. Qazirgi tańda birinshi jobalar josparlanyp jatyr. Aldaǵy ýaqytta bul nysandar tıisti paıdasyn kórsetedi», - dedi Asqar Jumaǵalıev.

Budan buryn habarlanǵandaı, Parlament Májilisiniń jalpy otyrysynda «1995 jylǵy 23 jeltoqsandaǵy Qazaqstan men Reseı arasyndaǵy Baıqońyr qalasynyń mártebesi jáne ondaǵy atqarýshy ókimet organdaryn qurýdyń tártibi men olardyń mártebesi týraly kelisimge ózgeris engizý týraly hattamany ratıfıkatsııalaý týraly» zań jobasy maquldandy.

Bul qujatqa sáıkes, Baıqońyrda qazaqstandyq memorgandar tizbesi taǵy 10 qurylymǵa tolyǵady.