«Baıqońyr» ǵarysh aılaǵynyń mártebesin aýystyrý tıimdi bolady - mınıstr

ASTANA. QazAqparat -  Qorǵanys jáne aeroǵarysh ónerkásibi mınıstri Beıbit Atamqulov «Baıqońyr» ǵarysh aılaǵynyń mártebesin áskerıden azamattyqqa aýystyrý máselesine pikir bildirdi, dep habarlaıdy QazAqparat tilshisi.

«Shynymen de «Baıqońyr» ǵarysh aılaǵynan áskerılerdi tolyqtaı shyǵarý Reseı Federatsııasynda qarastyrylyp jatyr. Ázirge, atalǵan másele boıynsha naqty ekijaqty kelissózderdi júrgizgen joqpyz. Alaıda bul baǵytta tıisti jumystar atqarylyp jatyr», - dedi Beıbit Atamqulov Májiliste tilshilerge bergen jaýabynda.

Mınıstrdiń atap ótýinshe, ǵarysh aılaǵynyń mártebesin azamattyq deńgeıge aýystyrýdyń ózindik ońtaıly tustary bar.

«Sebebi ashyq kommertsııalyq jobalardy tartý múmkindigi ashylady. Búginde kommertsııalyq sala álemde aıtarlyqtaı qyzyǵýshylyq týdyrýda. Bul turǵyda apparattardy ushyrýǵa qajettilik bar. Ótken joly aıtqanymdaı, álemde 1 000 myńnan astam spýtnık ushyrý qyzmetterin kútip tur», - dep túsindirdi Atamqulov.