Baıqońyr ǵarysh aılaǵynda Eske alý kúni atap ótildi

BAIQOŃYR. 24 qazan. QazAqparat - Búgin «Baıqońyr» ǵarysh kesheni 1960 jyly 24 qazanda jáne 1963 jyly 24 qazanda ǵarysh aılaǵynda qaıǵyly qaza tapqan zymyran tehnıkasyn synaýshylardy eske alýda.

1960 jyly osy kúni R-16 jańa zymyranyn ushyrýǵa daıyndyq kezinde 41-ushyrý alańynda oryn alǵan apattan 100-den astam adam, sonyń ishinde Artıllerııanyń bas marshaly Mıtrofan Nedelın qaza tapty.

1963 jylǵy 24 qazanda 70- ushyrý alańynda R-9A zymyranynyń gazdalǵan shahtasynda jumys júrgizý kezinde shyqqan órt saldarynan 8 adam qaza tapqan.

Sodan beri 24 qazan Baıqońyrda qaraly kún bolyp sanalady jáne ǵaryshqa tuńǵysh jol salýshylardy eske alýǵa arnalady. Bul kúni ǵarysh aılaǵyndaǵy barlyq jumys toqtatylyp, zymyrandar ushyrylmaıdy.

Tańerteń ertemen qaza tapqan zymyranshylar memorıalynyń aldyna Roskosmos mamandary, qalalyq kásiporyndar men uıymdar qyzmetkerleri, bilim berý mekemeleriniń oqýshylary, qala turǵyndary men qonaqtary jınaldy.

Qaraly sherýde Baıqońyr qalasy ákimshiligi basshysynyń mindetin atqarýshy Anatolıı Petrenko jáne Roskosmostyń «Baıqońyr» keshenindegi basqarma bastyǵynyń orynbasary Rostıslav Danılın sóz sóıledi.

Sherýge qatysýshylar eskertkishterge jáne alǵashqy zymyran-ǵarysh tehnıkasyn synaýshylardyń baýyrlastar zıratyna gúl qoıyp, eske aldy.