Baıqońyr ǵarysh aılaǵynan halyqaralyq ekıpajben «Soıýz TMA-11» ǵarysh kemesi ushyryldy

BAIQOŃYR. 7 qarasha. QazAqparat - Búgin Astana ýaqyty boıynsha tańǵy saǵat 10:14 mınýt 15 sekýndta Baıqońyr ǵarysh aılaǵynyń Gagarın alańynan ushqysh basqaratyn «Soıýz TMA-11M» kemesimen «Soıýz FG» zymyrany ushyryldy.

Halyqaralyq ǵarysh stansasyna quramynda «Soıýz TMA-11M» komandıri Mıhaıl Tıýrın, «Soıýz TMA-11M» bortynyń ınjeneri Rıka Mastrakkıo men «Soıýz TMA-11 M» 2 kemesiniń bort ınjeneri Koıchı Vakata bar ǵaryshkerler men astronavtardan turatyn ekıpaj attandy.

HǴS-ǵa attanǵan bul tájirıbeli ekıpajdyń stansadaǵy negizgi jumys baǵdarlamasynan basqa orbıtaǵa olımpıada alaýy bar kapsýlany jetkizý mindeti tur.

Roskomostyń baspasóz qyzmetinen habarlaǵandaı, ushqysh basqaratyn «Soıýz TMA-11 M» kemesi shtatty rejimde ushyryldy.

«Soıýz TMA-11 M» kemesiniń Halyqaralyq ǵarysh stansasymen jaqyndasyp, túıisýi kemeniń qozǵaltqyshynyń jumysyna baılanysty bolady.

Ekspedıtsııalaýshy 38/39-shy ekıpaj HǴS-ǵa alty saǵattan keıin, ıaǵnı Astana ýaqyty boıynsha 16:31-de jetedi dep boljanýda.