«Baıqońyr» ǵarysh aılaǵyna týrıstik joldama jarty mıllıon teńge turady

BAIQOŃYR. QazAqparat - Qazaqstan men Reseıdiń quzyrly organdary «Baıqońyr» ǵarysh kesheninde týrızm ınfraqurylymyn damytý boıynsha baǵdarlamany ázirlep, bekitkeli beri eki eldiń týroperatorlary «Baıqońyrda» bolyp qaıtýǵa resmı túrde shaqyra bastady.

Mysalǵa, «avıatsııalyq-ǵarysh týrızminiń jetekshi týroperatory» sanalatyn reseılik kompanııa 2017 jyldyń 20 aqpanyna belgilengen «Soıýz» basqarylatyn ǵarysh kemesiniń ushyrylymyn óz kózimen kórýge ótinimderdi qabyldaýdy bastady.

Standartty eki oryndyq nomerge bılet quny bir adamǵa 95 myń rýbldi quraıdy, qazaqstandyq valıýtamen eseptegende - 500 myń teńge.

«Baıqońyrdan basqarylatyn ǵarysh kemeleriniń ushyrylymyna týrlardy uıymdastyryp júrgenimizge kóp boldy. Bizdiń týrıster jylyna tórt ret atalmysh týrlarǵa qatysýǵa múmkindik alady. Osy ýaqytqa deıin «Baıqońyrdaǵy» týrlarǵa álemniń barlyq jerinen 150 adam qatysty. Búgingi kúni reseılik kosmonavtıkany nasıhattaýdy belsendi jalǵastyrýdamyz jáne ǵarysh týrızmin damytý úshin barynsha kúsh-jiger salyp kelemiz», - dep málimdedi týroperator.

Týrısterge «Baıqońyr» ǵarysh aılaǵyna tórt jáne alty kúndik týrlar usynylýda. Olar ushyrylym alańynda, mýzeıde bolyp, ǵarysh kemesiniń ushyrylymyn baqylaýǵa múmkindik alady. Sondaı-aq rejimdi nysannyń barlyq erejelerin qatań saqtaı otyryp, Baıqońyr qalasy boıynsha saıahattaıdy.