Baıqońyr balabaqshalarynda qansha bala qazaq tilinde tálim-tárbıe alýda
NUR-SULTAN. QazAqparat - Baıqońyrdaǵy Qazaqstan balabaqshalarynda 460 bala tárbıelenip jatyr. Bul týraly Senat depýtattarynyń saýalyna QR Premer-Mınıstri Asqar Mamıniń jaýabynda aıtylǵan, dep habarlaıdy QazAqparat tilshisi.
«Búgingi kúni Baıqońyr qalasynda 16 balabaqsha, onyń ishinde Qazaqstan Respýblıkasynyń Memlekettik jalpyǵa mindetti bilim berý standarttaryna (budan ári – MJMBS) sáıkes qazaq tilinde oqytatyn 3 balabaqsha bar. Balabaqshalarda barlyǵy 2 885 bala (onyń ishinde Reseı Federatsııasynyń balabaqshalarynda – 2 425, Qazaqstan Respýblıkasynyń balabaqshalarynda – 460 bala) tárbıelenip jatyr», - dedi Asqar Mamın .
Onyń atap ótýinshe, balalarǵa qazaq tilinde tárbıe berý jáne oqytý maqsatynda 2019 jyly memlekettik-jekeshelik áriptestik aıasynda eki jekemenshik balabaqsha ashylǵan.
«Sonymen qatar, qazaq tilinde oqytatyn 280 oryndyq balabaqsha ashý maqsatynda burynǵy № 21 «Vasılek» balabaqshasynyń ǵımaratyn Reseı Federatsııasynyń balansynan alý jáne ony Qarmaqshy aýdany ákimdiginiń kommýnaldyq menshigine berý jumystary júrgizilýde», - dedi Úkimet basshysy.
