«Baıqońyr» aılaǵynda Qazaqstannyń 85 azamaty qylmys jasap, olardyń bári Reseı zańymen sottalǵan

Bul týraly búgin QR Parlamenti Májilisinde «Baıqońyr» keshenin tıimdi paıdalaný jónindegi yntymaqtastyqty damytý týraly kelisimdi ratıfıkatsııalaý týraly» zań jobasyn talqylaý barysynda QR Ádilet mınıstrligi Halyqaralyq departamentiniń dırektory Elvıra Ázimova málim etti, dep habarlaıdy QazAqparat.

«Qazaqstan men Reseı arasyndaǵy «Baıqońyr» keshenin paıdalanýǵa qatysty týyndaǵan máselelerge oraı 2008 jyly kelisimge ózgerister engizý týraly hattamaǵa qol qoıylǵan bolatyn. Al qazirgi qoldanystaǵy jalǵa alý kelisimine sáıkes «Baıqońyr» aılaǵynda qyzmet etetin personalǵa jáne onyń otbasyna Reseıdiń zańy, basqa jaǵdaılarda Qazaqstannyń zańy qoldanylady. Degenmen, bul rette quqyq qorǵaý organdary arasynda zańdy qoldanýǵa qatysty jekelegen kelisim jasalýy qajettigi týraly aıtylady. Alaıda, kúni búginge deıin bundaı kelisim jasalǵan joq. Osy ýaqytqa deıin «Baıqońyr» ǵarysh aılaǵyna qarasty aýmaqta qazaqstandyq azamattarmen 85 qylmys jasaldy. Bulardyń barlyǵy Reseıdiń zańnamalary boıynsha jaýapqa tartylǵan. Osyǵan oraı, 2008 jyly jalǵa alý kelisimine ózgeris engizý týraly hattamaǵa qol qoıylyp, onda Qazaqstan azamattaryna qatysty, «olarǵa ǵarysh aılaǵynda jumys isteý, istemeýine qaramastan Qazaqstan zańy qoldanylady jáne bunda Qazaqstan quqyq qorǵaý organdary óz qyzmetin júzege asyrady» dep kórsetilgen. ıAǵnı, aılaqta eger RF quqyq qorǵaýshylary tarapynan qylmysqa qatysty ustalǵan bolsa da el azamattary jedel qaıtarylýy tıis. Degenmen, bul qujat zańdy kúshine enýi úshin parlamentpen ratıfıkatsııalanýy tıis», dedi E. Ázimova.

Onyń aıtýynsha, atalǵan hattamany ratıfıkatsııalaý týraly zań jobasy Úkimet qorjynynda jatyr. Jaqyn aralyqta bul zań jobasy Parlament Májilisine beriledi.

Degenmen de, depýtattar erekshe mártebesi bar aılaqqa, ondaǵy Qazaqstan azamattaryna qatysty osynsha mańyzdy jobanyń áli kúnge Úkimette jatqanyna alańdaýshylyq bildirdi. «Memleketaralyq kelisim jasalǵan 1994 jyldan beri 16 jyl ótti. Sol jyldary Memleket basshysy tıisti úkimetaralyq kelisimderdi jasaýǵa da tapsyrma júktegen bolatyn. Sodan beri 16 jyl boıy Baıqońyrdaǵy Qazaqstan azamattarynyń quqyǵy buzylyp keledi. Endigi kúni Úkimet bundaı máselege selqos qaraýyn qoıýy shart», dedi depýtat Sát Toqpaqbaev.