Baıqońyr ákimshiliginiń basshysy turǵyndarǵa úndeý joldady
«Jańa koronavırýs ınfektsııasyna qarsy kúres boıynsha qaladaǵy jaǵdaı turaqty, birtindep qalypqa kelip jatyr. Búgingi tańda medıtsına aýrýmen kúresýde, biraq eger shekteýlerdi alyp tastasa, aýrýǵa shaldyqqandar sany kóbeıip, medıtsına der kezinde kómek kórsete almaı qalady», - delingen ákimshilik basshysynyń habarlamasynda.
Bas sanıtarlyq dáriger men jedel shtabtyń sheshimine sáıkes, Baıqońyr qalasynda karantın 2020 jyldyń 2 tamyzyna deıin sozyldy. Reseı Federaldy medıtsınalyq-bıologııalyq agenttiginiń «Baıqońyr» kesheni óńirlik basqarmasynyń resmı málimeti boıynsha, Baıqońyr qalasynda koronavırýs ınfektsııasyna shaldyqqandar sany 2020 jyldyń 21 shildesinde 712 adamdy qurap otyr. Infektsııalyq statsıonarda em qabyldap jatqan azamattar sany - 136 adam. 2020 jyldyń 1-21 maýsymy aralyǵynda 258 adam emdelip shyqty. COVID-19-dan qaıtys bolǵandar sany – 43 adam.
«Osy jaǵdaıǵa kim kináli: Qazaqstan ba, álde Reseı me degen sekildi pikirlerdi oqyp, tańǵalasyń. Adamdar COVID-19-dan aınalyp ótýge bolady dep oılaı ma? Men shekteý sharalarynan sharshaǵandaryn túsinemin. Biraq, tek osyndaı qatań sharalar ǵana epıdemııanyń órshimeýine múmkindik berip otyr», - dep atap ótti qala basshysy úndeýinde.
Jedel shtab tóraǵasy egde jastaǵy adamdarǵa, ardagerler men múgedekterge azyq-túlik, dári-dármek jetkizý boıynsha kómek kórsetip júrgen eriktilerdiń jumysyn atap ótti. Medıtsına qyzmetkerleri men ınfektsııalyq bólimde jatqan naýqastarǵa asa qajetti zattardy, sý jetkizýdi uıymdastyrǵan qala kásipkerlerine, qoǵam uıymdaryna alǵys aıtty.
Belgili bolǵandaı, taıaýda Baıqońyrǵa Roskosmos basshylyǵy Reseı Federaldy medıtsınalyq-bıologııalyq agenttigimen birlesip kómekke jibergen medıtsına mamandarynyń úshinshi brıgadasy kelip jetti.
«Qazaqstandyq mamandar Baıqońyr qalasynda shuǵyl túrde 100 oryndyq provızorlyq gospıtal ashty. Qaladaǵy dárihanalarda maska, qolǵap, antıseptık, barlyq qajetti dári-dármekter jetkilikti. Búginde sizderdiń árqaısysyńyzdan pandemııamen kúreste birlik pen tózimdilik, ózara túsinistik pen qoldaý qajet. Tek birlesip qana dárigerlerdiń keńesin oryndaı otyryp, aýrýǵa qarsy tura alamyz», - dep atap ótti Baıqońyr qalasy ákimshiliginiń basshysy.
