«Baıqońyrdyń» birqatar týrıstik nysany Qazaqstanǵa qaıtarylmaq
ASTANA. KAZINFORM – «Baıqońyr» kesheninde Týrızmdi damytý tujyrymdamasy ázirlenip jatyr. Bul jaıynda Májilis depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
– «Baıqońyr» kesheniniń týrıstik áleýetine erekshe nazar aýdarylady. Ony keńeıtý úshin «Kazakh Tourism» AQ «Baıqońyr» kesheninde Týrızmdi damytý tujyrymdamasyn ázirleý boıynsha jumystar júrgizilip jatyr. Sondaı-aq 2024 jyldyń qarasha aıynda «Soıýz» zymyrandarynyń ushyrylýyn baqylaý úshin kıiz úı ornatylyp, ulttyq stılde bezendirilgen «QAZQOSMOS» baqylaý pýnkti salyndy, - dedi Úkimet basshysy jaýabynda.
Onyń atap ótýinshe, budan basqa ǵarysh aılaǵynyń birqatar tartymdy týrıstik nysanyn («Nóldik kvartal», «Gagarındik besedka» (10-alań), «Kottedjder» qonaqúıleri (2j-alań), Montajdaý-janarmaı quıý kesheni (112A-alań), Dınamıkalyq synaqtar stendi (112d-alań) jalǵa alý jáne Qazaqstan tarabyna qaıtarý jumysy júrgizilip jatyr.
– 2025 jyldyń birinshi jartyjyldyǵynyń sońyna deıin «Gagarındik start» nysan jalǵa alý boıynsha jumystardy aıaqtaý josparlanǵan. «Infrakos» RMK qazaqstandyq jáne reseılik týroperatorlarmen qyzmet kórsetý sharttary jasaldy. «GEORARK ARAL» qoǵamdyq qorymen memorandýmǵa jáne «Kazakh Tourism» AQ men «BSL consulting» JShS-men yntymaqtastyq týraly úshjaqty kelisimge qol qoıyldy. Buǵan qosa, «Báıterek» BK» AQ ǵarysh zymyran keshenin qosa alǵanda, kásiporynnyń negizgi nysandaryn qamtıtyn ekskýrsııalyq baǵdarlamalardy bekitti, - dedi Oljas Bektenov.
Aıta keteıik, Memleket basshysy Qasym-Jomart Toqaev «Baıqońyr» ǵarysh aılaǵynyń qurylǵanyna 70 jyl tolýyna oraı vıdeoúndeý joldady.