«Baıqońyrdan» zymyrannyń ushyrylý sátin 11 myńnan astam týrıst tamashalaǵan
QYZYLORDA. KAZINFORM – Jyl basynan beri «Baıqońyr» ǵarysh aılaǵynan 1 zymyran ushyrylyp, ony myńnan astam týrıst tamashalaǵan.
Sońǵy jyldary álemdegi alǵashqy ári eń iri kosmodromdy kórýge qyzyǵýshylyq bildirgender qatary kóbeıip keledi. Qyzylorda oblystyq dene shynyqtyrý, sport jáne týrızm basqarmasynyń málimetine súıensek, ótken jyly «Baıqońyr» keshenine 11 myńnan astam týrıst taban tiregen. Al 2023 jyly bul kórsetkish 10 myńnan joǵary bolǵan
Juldyzdy qalashyqtaǵy týrıstik qyzmetke qatysty máselelerdi Reseı tarapynan «TsENKI» AQ, al Qazaqstan tarapynan «Báıterek» AQ jáne «Infrakos» ShJQ RMK úılestiredi.
– «Baıqońyr» – qala men ǵarysh aılaǵyn biriktiretin, dúnıe júzinde balamasy joq birden-bir keshen. Qazir qalada 671 nómirli qory bar 7 qonaq úı jumys istep tur. Búgingi kúni «Báıterek» aktsıonerlik qoǵamy «RocketGo», «Fotosafari» sııaqty otandyq týrfıralarmen jumys júrgizip keledi. Jyl basynan beri týrfırmalar arqyly zymyran tasyǵyshtyń ushyrylýyn myńnan astam adam kelip qyzyqtaǵan, – dedi basqarmanyń týrızmdi damytý bóliminiń basshysy Aıdos Paızýllaev.
Baıqońyr qalasynyń týrıstik áleýetin arttyrý baǵytynda birqatar naqty sharalar qabyldanǵan. Byltyr qarashadaǵy zymyran ushyrý kezinde ǵarysh aılaǵynyń tarıhynda alǵash ret Aeroǵarysh komıtetiniń kıiz úı túrindegi qazaqstandyq baqylaý pýnkti ashyldy. Baıqońyr kesheni Qazaqstan Respýblıkasynyń týrıstik salasyn damytýdyń 2023-2029 jyldarǵa arnalǵan tujyrymdamasy aıasynda TOP-20 tizimine engizildi.
Jalpy, osy jyly «Baıqońyr» ǵarysh aılyǵynan 8-9 zymyran ushyrý josparlanyp otyr.
2025 jylǵa deıin «Baıqońyr» ǵarysh aılaǵynan toǵyz ret zymyran ushyrý josparlanǵan.