Baıqońyrdan ushyrylǵan «Soıýz-5/Suńqar» zymyran-tasyǵyshy qalaı jabdyqtalǵan
ASTANA. KAZINFORM – Jasandy ıntellekt jáne tsıfrlyq damý mınıstrligi Baıqońyr ǵarysh aılaǵynda 45-shi alańnan «Báıterek» ǵarysh zymyran kesheni arqyly orta klasty «Soıýz-5/Suńqar» perspektıvti zymyran-tasyǵyshynyń alǵashqy synaq ushyrylymy júzege asyrylǵanyn rastady.
- Ushý-konstrýktorlyq synaqtar aıasynda zymyrannyń birinshi jáne ekinshi satylary shtattyq rejımde jumys istep, gabarıttik-massalyq maket eseptelgen traektorııaǵa sátti shyǵaryldy. Bul bastama Qazaqstannyń álemdik ǵaryshtyq qyzmet kórsetý naryǵyndaǵy úlesin arttyrý úshin kúrdeli ınjenerlik nysannyń tolyq paıdalanýǵa daıyn ekenin rastady, - dedi mınıstrlikten.
«Báıterek» jobasy – elimizdiń jeke zamanaýı ushyrý ınfraqurylymyn paıdalanýǵa kóshýine múmkindik beretin strategııalyq jetistik.
Keshendi qurý barysynda jerústi ınfraqurylymyn jańǵyrtý, ushyrý júıelerin, basqarý, janarmaı quıý jáne qaýipsizdik júıelerin salý men beıimdeý boıynsha aýqymdy jumystar júrgizildi. Engizilgen sheshimder ushý aldyndaǵy operatsııalardy avtomattandyrýdyń joǵary deńgeıin qamtamasyz etedi jáne halyqaralyq senimdilik standarttaryna tolyq sáıkes keledi.
- «Báıterek» ǴZK jobasyn iske asyrý – sońǵy jyldardaǵy eń kúrdeli tehnologııalyq jobalardyń biri. Avtomattandyrý jáne qaýipsizdik talaptaryna tolyq jaýap beretin zamanaýı keshen quryldy. Búgingi ushyrylym Qazaqstannyń ǵarysh ındýstrııasyna tolyqqandy qatysý úshin barlyq qajetti elementi, sonyń ishinde jeke ushyrý ınfraqurylymyn, ulttyq spýtnıktik jobalardy jáne joǵary bilikti ınjenerlik kadrlardy qalyptastyrǵanyn dáleldeıdi. «Báıterek» zymyran kesheniniń sátti ushyrylýy ǵaryshty ıgerýde jańa múmkindikterge jol ashady, al jobany júzege asyrý jańa jumys oryndaryn qurýǵa jáne orbıtaǵa ǵarysh apparattarynyń keń jelisin shyǵarý áleýetin keńeıtýge múmkindik beredi. Ushyrýǵa daıyndyq jumystary barlyq toraptar men agregattardyń minsiz jumys isteýine basymdyq bere otyryp, tehnologııalyq reglamentterge qatań sáıkestikte júrgizildi, - delingen mınıstrlik habarlamasynda.
Jańadan qurylǵan ǵarysh zymyran keshenin paıdalaný úshin 40-tan astam tehnıkalyq júıe jumyldyryldy. Synaqtardyń tolyq tsıkli barysynda olardyń tıimdi ózara is-qımyly qamtamasyz etildi.
«Progress» zymyran ǵarysh ortalyǵanda ázirlengen «Soıýz-5/Suńqar» tasyǵyshynyń tehnıkalyq sıpattamalary tómen jer mańy orbıtasyna 17 tonnaǵa deıin paıdaly júkti shyǵarýǵa múmkindik beredi.
Zymyran qýatty ári tekserilgen qozǵaltqyshtarmen jabdyqtalǵan: birinshi satyda - RD-171MV jáne ekinshi satyda - RD-0124MS.
Fregat kúsheıtkish qondyrǵylar tobyn jáne ártúrli paıdaly júktemeni ornatý optsııalaryn paıdalaný tapsyrmalardyń keń aýqymyn sheshýde ıkemdilikti qamtamasyz etedi. «Báıterek» kesheni men «Soıýz-5/Suńqar» zymyrany kerosın men suıyq ottegi sııaqty ýly emes otyndy qoldana otyryp, ekologııalyq taza kosmonavtıkanyń bolashaǵyn aıqyndaıdy, sondaı-aq ǵylymdy damytý men eldiń ındýstrııalyq áleýetin nyǵaıtý úshin jańa perspektıvalar ashady.
«Báıterek» BK» AQ – Baıqońyr ǵarysh aılaǵynda ǵarysh zymyran kesheni jobasyn iske asyrý úshin qurylǵan birlesken Qazaqstan-Reseı kásiporny.
Kompanııa jańa býyn zymyran-tasyǵyshtaryn ushyrýǵa arnalǵan keshenniń jerústi ınfraqurylymyn qurýǵa, damytýǵa jáne paıdalanýǵa jaýapty.
Jobany Jasandy ıntellekt jáne tsıfrlyq damý mınıstrligi reseılik seriktestermen birlesip júzege asyryp jatyr. «Báıterek» ǴZK ekologııalyq qaýipsizdiktiń joǵary deńgeıimen, ekonomıkalyq tıimdiligimen jáne ushý aldyndaǵy operatsııalardyń tolyq avtomattandyrylýymen erekshelenedi.
Baıqońyrdan alǵash ret «Suńqar» zymyrany ushyrylǵanyn jazǵan edik.
