Baıqońyrdan «Soıýz MS-29» ǵarysh kemesi ushyryldy
ASTANA. KAZINFORM — Eki reseılik ǵaryshker men NASA astronavty mingen «Soıýz MS-29» ǵarysh kemesi belgilengen orbıtaǵa shyǵyp, Halyqaralyq ǵarysh stantsııasyna (HǴS) bet aldy.
Ekıpaj ushar aldyn birneshe kúndi Baıqońyrdaǵy «Kosmonavt» qonaqúıinde ótkizdi. Bul — adam qatysatyn ǵarysh saparlary aldynda kóp jyldan beri saqtalyp kele jatqan dástúrdiń biri. Ǵaryshkerler ózderi turǵan bólmelerdiń esikterine qoltańba qaldyrdy. Al ǵarysh aılaǵyna shyǵar aldynda dástúr boıynsha «Shóldegi aq kún» (White Sun of the Desert) fılmin tamashalady.
Zymyran ushyrylar aldynda tikeleı efır kórermenderine arnaıy kontserttik baǵdarlama usynyldy.
Astana ýaqytymen saǵat 19:47:50-de № 31 ushyrý alańynan «Soıýz-2.1a» zymyran kókke kóterildi. Shamamen toǵyz mınýttan keıin «Soıýz MS-29» kemesi zymyrannyń úshinshi satysynan bólinip, orbıtaǵa shyqty.
Keme komandıri — «Roskosmos» ǵaryshkeri Petr Dýbrov. Onymen birge reseılik ǵaryshker Anna Kıkına men NASA astronavty Anıl Menon Halyqaralyq ǵarysh stantsııasyna attandy.
Petr Dýbrov pen Anna Kıkına úshin bul — ǵaryshqa ekinshi sapar. Dýbrov alǵashqy saparynda orbıtada bir jylǵa jýyq ýaqyt bolyp, ashyq ǵaryshqa tórt ret shyqqan. Al Kıkına buǵan deıin Halyqaralyq ǵarysh stantsııasyna amerıkalyq Crew Dragon kemesimen ushyp baryp, ǵaryshta 157 táýlik ótkizgen.
Al Anıl Menon alǵash ret ǵaryshqa ushty. Mamandyǵy boıynsha ol — jedel járdem dárigeri ári ınjener-mehanık. NASA astronavtar tobyna qabyldanǵanǵa deıin ushý dárigeri bolyp jumys istep, Halyqaralyq ǵarysh stantsııasyna jasalǵan ekspedıtsııalardyń medıtsınalyq daıarlyǵyna qatysqan. SpaceX kompanııasynyń alǵashqy adam qatysqan ǵarysh mıssııalaryn ázirleýge atsalysqan.
«Soıýz MS-29» Halyqaralyq ǵarysh stantsııasyna qysqa marshrýtpen ushyp barady. Birneshe saǵat ishinde keme Jerdi eki ret aınalyp ótip, stantsııaǵa jetedi. Astana ýaqytymen 22:56–da keme Halyqaralyq ǵarysh stantsııasynyń Reseı segmentindegi «Prıchal» modýline avtomatty túrde jalǵanady.
Stantsııaǵa jetken soń ekıpaj aldymen 74-uzaq merzimdi ekspedıtsııa quramyna qosylyp, keıin jumysyn 75-ekspedıtsııa aıasynda jalǵastyrady. Ǵarysh sapary 261 táýlikke josparlanǵan. Ekıpaj Jerge 2027 jyldyń kókteminde oralady. Osy ýaqyt ishinde Reseı baǵdarlamasy boıynsha ashyq ǵaryshqa eki ret shyǵý josparlanǵan.
Ekspedıtsııa barysynda ekıpaj ǵylymı zertteýler júrgizip, stantsııadaǵy josparly jumystardy atqarady. Baǵdarlamaǵa ǵaryshta jartylaı ótkizgish krıstaldaryn ósirý, adamnyń qan aınalymy júıesi men qan tamyrlaryndaǵy ózgeristerdi zertteý, jasandy ıntellekt kómegimen ýltradybystyq zertteýler júrgizý, sondaı-aq bıoprınter arqyly qan tamyrlarynyń qurylymdaryn jasaý engizilgen.
Baıqońyrdaǵy ushýdy NASA basshysy Djared Aızekman da tamashalady. Bul — amerıkalyq ǵarysh agenttigi basshysynyń Baıqońyrǵa sońǵy segiz jyldaǵy alǵashqy sapary.
Eske salaıyq, búgin № 31 ushyrý alańy jóndelgennen keıin odan alǵash ret adam qatysqan ǵarysh kemesi ushyryldy. Alań 2025 jyldyń qarasha aıynda «Soıýz MS-28» kemesi ushyrylǵannan keıin zaqymdanǵan bolatyn. Jóndeý jumystary 2026 jyldyń basynda aıaqtaldy. Al naýryz aıynda osy alańnan alǵash bolyp «Progress MS-33» júk kemesi ushyrylǵan edi.
